Estafa queen nasakote

Nasakote ng pulisya ang isang umano’y estafa queen matapos itong ipagharap ng reklamo ng 56 katao na kanyang niloko ng P3 million kapalit ng pangakong trabaho sa abroad kahapon sa Pasay City.

Kinilala ang suspek na si Cynthia Tupaz, 48, may asawa, nakatira sa Unit 308 Araneta Mansion, 28-C, Jose St., Malibay ng lungsod na ito.

Ayon sa reklamo ng mga biktima na pawang tubong Nueva Eciya, Tarlac, at Zambales ay nagtungo sila sa Maynila upang mag-apply ng trabaho bilang domestic helper, clerck at factory worker patungong Korea sa 4-1 Travel Tours na matatagpuan sa bahay ng suspect.

Hiningan umano ni Tupaz ang mga biktima ng P60,000 bawat isa kapalit ng mabilisang trabaho sa nabanggit na bansa.

Subalit naibigay na ng mga biktima ang mga nabanggit na halaga, ngunit hanggang sa ngayon ay hindi pa sila nakakaalis gaya ng pangako ng suspect at kapag hinahanap nila si Tupaz, palipat-lipat ito ng lugar.

Sa isinagawang surveillance ng mga kagawad ng Pasay City Police, nadakip ang suspect na si Tupaz mismo sa tinitirhan nitong bahay sa naturang lugar. (Ulat ni Lordeth Bonilla)