Dakong alas-5 ng hapon ng bawian nang buhay ang dating child actress sa intensive care unit ng Parañaque City Medical Center bunga ng tatlong tama ng bala na bumaon sa ulo nito matapos na paulanan ng bala ng hindi pa matukoy na kalalakihan dakong alas-4:15 ng madaling araw noong Martes sa loob ng BF International sa Las Piñas City.
Base sa inisyal na ulat ng pulisya, sinasabing ang pamamaril ay nag-ugat dahil lamang sa matagal nang alitan ng dalawang pamilya. Isa rito ay ang pamilya ng boyfriend ni Strawberry na si John Mark Doromal at ang pamilya Picar.
Nabatid na Martes ng madaling araw, sinabi ng mga testigo na nakita nilang nakaparada malapit sa gate ng nabanggit ng subdivision ang sasakyan ni Doromal na dito nakasakay din ang dating child actress at parang may inaabangan.
Ilang sandali pa ay dumating ang isang sasakyan na sinasabing kinalululanan naman ng magkapatid na Ronald Glen at Ryan Picar na dito na nagkaroon ng kaguluhan kasunod ang sunud-sunod na putok ng baril.
Binanggit pa ng pulisya na natapos na ang isinagawang pagsisiyasat sa mga Picar.
Gayunman ang kasintahan ni Strawberry ay lumulutang na kahapon sa NBI.
Isang masusing imbestigasyon pa ang isinasagawa ng pulisya ukol dito.
Si Strawberry ay lalong nakilala sa programang ‘Chicks to chicks’ at pelikulang ‘Manu-mano’.