Bestfriend ni Nida nawawala

Pinaghahanap na rin ng mga ahente ng National Bureau of Investigation ang sinasabing isa sa mga pinakamatalik na kaibigan ng pinaslang na aktres na si Nida Blanca matapos na maglaho ito at hinihinalang nagtatago habang kasagsagan ng isinasagawang imbestigasyon ng NBI kaugnay sa karumal-dumal na pagpatay sa aktres.

Ayon kay NBI-NCR Director Atty. Edmund Arugay, pinahahanap na rin nila si Candelaria Tantoco, matalik na kaibigan ni Blanca upang sagutin nito ang mga nakahandang katanungan kaugnay sa mga nalalaman nito sa kaibigan.

Nabatid na mula nang makita sa telebisyon si Candelaria ay hindi na rin napagkikita ito.

Nakatakdang isunod para ipasailalim sa lie detector test o polygraph test si Tantoco makaraan ang isasagawang pagtatanong sa kanya matapos na ipasailalim na sa nasabing eksaminasyon sina Rod Luaren Strunk, asawa ng aktres at personal na sekretarya rin ng aktres na si Elena dela Paz. (Ulat ni Ellen Fernando)