Binawian nang buhay habang ginagamot sa Las Piñas Medical Center ang biktimang si Christina , ng Sta. Ana, Manila.
Samantala, kinilala naman ang suspect na si Dra. Lucila Lim ng Parola St. CAA Compound, Las Piñas City.
Ayon sa isinagawang imbestigasyon ni SPO1 George Gabriel ng Criminal Investigation Division (CID) ng Las Piñas City na dakong alas-5:30 hanggang alas-10:00 kamakalawa ng umaga nagtungo ang biktima sa maternity clinic ni Lim na matatagpuan sa nabanggit na lugar upang magpa-abort. Hindi binanggit sa ulat kung ilang buwan nang buntis ang biktima.
Matapos umanong maisagawa ang abortion, tinawagan ni Christina sa telepono ang kaibigang si Maricel Abalayon upang alalayan at kunin siya sa nasabing clinic.
Agad namang dumating ang kaibigan kasama sina Mary Jane Albueno at Aurora Candelaria na doon ay hiniling sa kanila ng biktima na dalhin na siya sa pagamutan dahil masama ang kanyang pakiramdam dulot ng isinagawang pagpapalaglag.
Nabatid na hinimatay ang biktima kaya’t agad itong dinala sa pagamutan ng tatlong kaibigan.
Gayunman, habang ito ay nilalapatan ng lunas sa ospital ay binawian ito nang buhay.
Patuloy naman ang isinagawang imbestigasyon ng pulisya gayundin ang paghahanda ng kaso laban sa suspect na doktora. (Ulat ni Lordeth Bonilla)