Planong pagtaas ng singil sa tubig tinutulan

Tinutulan kahapon ng iba’t ibang grupo ang plano ng Maynilad Waters na maitaas ang singil sa tubig na aabutin ng P4.75 kada cubic meter.

Ikinatwiran ng Freedom from Debt Coalition, Sanlakas, Courage at grupong Bayan na hindi pa napapanahon na magtaas ng singil sa tubig ang Maynilad Waters dahil katatapos lamang nitong magtaas ng singil noong nakaraang buwan ng Abril na umaabot sa 30 sentimos kada cubic meter.

Hindi pa rin umano nagaganap ang pangako ng kompanya noon na kaya itinaas ang singil sa tubig ay upang madaluyan ng suplay ang mahihirap at malalayong lugar at magkaroon ng sapat at malinis na tubig ang mga consumers.

Dinahilan din ng naturang grupo na labag sa kontrata ng Maynilad na makapagtaas ulit ito ng singil sa tubig.

Sa kanyang panig, sinabi naman ni Maynilad Waters Inc. President Rafael Alunan na ang planong increase sa singil sa tubig ay isang paraan upang mapunan ang pangangailangan sa pondo na gagamitin sa pagpapahusay sa serbisyo ng kompanya. (Ulat ni Angie dela Cruz)