Kasong "Kuratong" nina Lacson, itinigil muna

Pinaboran kahapon ng Court of Appeals ang naging kahilingan ni Senator elect Panfilo Lacson sa pamamagitan ng pagpapalabas ng Temporary Restraining Order na pansamantalang nagpapatigil sa pagsasagawa ng imbestigasyon sa binuksang kontrobersiyal na Kuratong Baleleng rubout case.

Sa dalawang pahinang desisyon ng CA-3rd Division, inatasan ni Associate Justice Eriberto Rosario si Justice Secretary Hernando Perez at Quezon City RTC Judge Teresa Yadao ng branch 81 na ipagpaliban ang pagsasagawa ng anumang uri ng imbestigasyon sa kaso.

Pinagbawalan ng CA ang QC at Manila RTC na magpalabas ng warrant of arrest laban kay Lacson at iba pang dating opisyal ng binuwag na Presidential Anti Crime Commission (PACC) na isinasangkot sa pagpatay sa mga miyembro ng Kuratong Baleleng Group noong 1995.

Gayunman binigyan ni Justice Rosario sila Lacson ng sampung araw para magsumite ng kanilang komento ukol sa hinihiling na writ for preliminary injunction.

Magugunita na hiniling ni Lacson sa CA na magpalabas ng TRO sa binuksang kaso ng Kuratong Baleleng para mapigilan ang korte na magpalabas ng warrant of arrest. (Ulat ni Grace Amargo)