Lalaki napugutan sa sumabog na pill box

Napugutan ng ulo ang isang lalaki, samantala nasugatan naman ang isang 9-anyos na batang babae nang masabugan ng pill box na inihagis ng hindi pa nakikilalang mga suspek, kahapon ng madaling araw sa bayan ng Taguig.

Natanggal ang ulo ni Roel Pacete, 23, ng Block 138 Lot 10 barangay Upper Bicutan, habang sugatan ang batang si Raquel Reymundo ng Block 137 Lot 44 nasabing barangay.

Nabatid kay PO2 Alain Sigua ng Taguig police, nakikipag-inuman si Pacete sa ilang kaibigan bandang ala-1:30 kahapon ng madaling araw sa Sumacwell st., ng isang pill box ang biglang inihagis at kasabay ng pagsabog ng bomba ang pagkakaputol ng ulo ni Pacete.

Tinamaan naman ang batang si Reymundo na nakikipaglamay sa patay ng mga oras na ‘yon.

Inaalam na ng pulisya ang reponsable sa pagpapasabog at hinihinalang grupo ng mga kabataang nag-aaway ang may kagagawan. (Ulat ni Lordeth Bonilla)