Ginagamot ngayon sa Rizal Medical Center si Edwin Manaday, 27, ng #703 Lanzones st., Sitio Napico, Bgy. Manggahan, Pasig City. Nagtamo ito ng isang tama ng saksak sa tagiliran.
Pinaghahanap naman ang nakatakas na suspek na si Ruel Judilla.
Sa ulat ng pulisya, naganap ang insidente dakong alas-5 ng hapon sa lugar ng biktima. Panay umano ang "hits" sa tong-its ni Manaday laban sa dalawang kalaro habang nakikipag-inuman naman si Judilla sa kabilang lamesa kasama ang dalawa pang kapitbahay.
Matapos na muling "maka-two hits" si Manaday, lumapit sa mesa ng biktima si Judilla at sinabihan ito ng "dinadaya mo yata sila kaya panay ang tama mo eh!" Hindi naman ito pinansin ng biktima dahil sa lasing na nga ito.
Sumunod na nanghingi naman ng balato para pambili ng alak at pulutan si Judilla kay Manaday na hindi na naman pinansin ng huli. Dito na nagalit ang suspek at inundayan ng saksak ang biktima gamit ang dala niyang balisong at saka mabilis na tumakas. (Ulat ni Danilo Garcia)