Lasing 'kumasa' ng toy gun, binoga ng pulis

Isang lasing na lalaki ang nabaril at napatay ng isang miyembro ng Central Police District dahil lamang sa isang toy gun kahapon ng madaling-araw sa loob ng isang videoke bar sa Caloocan City.

Kinilala ang biktima na si Jerry Arellano, 26, welder, ng Block 1, Lot 35, Park View heights, Bagumbong ng nasabing lungsod.

Sa inisyal na imbestigasyon, dakong alas-4:30 ng madaling araw nang maganap ang insidente sa Park View Heights, Bagumbong.

Nabatid na lasing umano ang biktima nang sapilitan nitong buksan ang pintuan ng videoke bar na noon ay Sabado na.

Nakita umano siya ni Marcelino Susana, barangay kagawad ng Barangay 171 ng naturang lugar at kaya agad na tumawag ng pulis dahil sa pag-aakalang nais looban ng nabanggit na biktima ang naturang bar.

Agarang dumating ang pulis na si PO2 Daniel Liwag, beat patrol ng CPD-station 4 at sinita umano nito si Arellano, subalit bumunot umano ang biktima ng baril na nakasukbit sa kanyang baywang.

Sa buong akala umano ni PO2 Liwag na isang tunay na 9mm pistol ang hawak ng biktima kaya agad niya itong pinapatukan sa katawan. (Ulat ni Rose Tamayo)