Pulis na 'protektor' ng cellphone gang snatchers dinampot

Isang pulis na protektor umano ng cellphone gang snatchers ang inaresto ng mga kagawad ng Central Police District (CPD) matapos ang pagkakapatay sa dalawang kabataang snatcher kamakailan sa Quezon City.

Kinilala ni C/Supt. Victor Luga, hepe ng CPD ang suspek na si PO1 Socrates Galvez, nakatalaga sa CPD Galas police station 11.

Ayon kay SPO2 Efren Sobrepeña, naaresto ng grupo ng Criminal Investigation Division (CID) ang suspek sa Blk 2 Galas, QC dakong ala-una kahapon ng madaling araw matapos ituro ni Yolanda Deceo, ina ng isang snatcher na si Joel Deceo na siyang utak umano ng lahat ng operation na ginagawa ng kanyang anak.

Si Joel ay malubhang nasugatan samantala ang dalawa pa nitong kasama na sina Francis Mijares, 15, at Richard Embile ay namatay nang pagbabarilin ni PO2 Ruel Yepes habang tumatakas tangay ang hinablot na Nokia 3310 ng biktimang si Melvin Pala sa kahabaan ng E. Rodriguez Ave., malapit sa St. Luke’s Medical Center. (Ulat ni Gemma Amargo)