Jinggoy vs Zamora sa congressional seat

Ano kaya ang magiging damdamin ni dating Executive Secretary Ronaldo Zamora matapos na mabalitaan nito na ang makakaharap niya sa pagka-kongresista sa darating na halalan sa Mayo 14 sa bayan ng San Juan ay si Mayor Jinggoy Estrada sa ilalim ng partidong Lapian ng Masang Pilipino (LAMP) na kanya ring ka-partido?

Ito ang inihayag ni Jinggoy sa panayam ng mga mamamahayag matapos umuwi na sila ng dating Pangulo sa kanilang tahanan sa Polk St., Greenhills, San Juan kamakalawa ng hapon mula sa Malacañang.

Naniniwala naman ang batang Estrada na magwawagi siya sa darating na halalan bilang kongresista at pagtakbo sa Senado ay kanya na lamang binalewala dahil tiyak na matatalo lamang siya dahil sa nangyari sa kanilang pamilya habang ang kanyang half-brother na si JV Ejercito ang kakandidatong alkalde.

Sa pangyayaring ito ay nanganganib na masira na ang political career ng kasalukuyang Cong. Jose Mari Gonzales at Zamora na kapwa miyembro ng LAMP.

Magugunita na nagbitiw si Zamora sa kanyang tungkulin upang paghandaan ang pangangampanya habang si Gonzales ay sinampal naman ang Sgt.-at-Arms ng Kamara. (Ulat nina Rudy Andal at Danilo Garcia)