Bahagyang pasa at sugat lamang sa ulo ang tinamo ng biktima na nakilalang si Jose Caneta, 49, may-asawa, residente ng Parcel St., Old Sta. Mesa, Maynila at ngayon ay nilalapatan ng lunas sa Philippine General Hospital.
Base sa report na isinumite ng Western Police District-Traffic Enforcement Office, naganap bandang alas-6:20 ng umaga ay katatapos lang makipag-inuman si Caneta sa kanyang mga kaibigan.
Habang pasuray-suray na naglalakad dahil sa sobrang kalasingan, humantong ito sa may gawing riles ng tren at hindi nito napansin at narinig ang malakas na busina ng padating na tren na nagmula sa Tutuban patungong Laguna.
Ayon sa ilang saksi, mabilis na nahagip at nasalpok ang biktima na inakala ng mga residente doon na nagkalasug-lasog na ang katawan nito.
Laking mangha ng mga nakasaksi nang makitang nakahiga lamang si Caneta at may galos lamang sa katawan at ulo.