Patay na ng matagpuan sa kanyang silid si Angelito Junsay, 54, driver, ng Abes compound, Sangandaan nasabing lungsod sanhi ng isang tama ng bala ng kalibre .38 baril sa sintido.
Agaw-buhay naman sa MCU Hospital ang kinakasama nitong si Marlyn dela Peña, 43, fish vendor, ng nasabing address na nagtamo ng isang tama ng bala sa ulo.
Sa ulat ni C/Insp. Alfredo Corpuz, hepe ng Station Investigation and Intelligence Division (SIID) ng Caloocan police, nag-away ang dalawa matapos maghinala si Junsay na may ibang lalaki si dela Peña. Ang pagtatalo ay nauwi sa pagkuha ng lalaki ng kanyang baril at binaril sa ulo ang babae.
Ang insidente ay nakatawag ng pansin sa mga kapitbahay na agad nagsugod sa biktima sa ospital habang si Junsay ay naiwan sa kanilang kuwarto at ilang oras umanong nagkulong.
Ilang sandali pa ay nakarinig ng isang putok ang mga kapitbahay at ng kanilang puntahan ay natagpuan ang bangkay ni Junsay.
Narekober sa crime scene ang kalibre .38 baril at isang masusing pagsisiyasat na ang isinasagawa. (Ulat ni Gemma Amargo)