Inakusahan nina Konsehal Chiqui Roque-Villaroel at Eddie Torres si Vicencio ng dishonesty, grave misconduct at grave abuse of authority at sa tulong nina Atty. Edna Herrera-Batacan at Atty. Carmencita Chua ay naisampa ang kasong administratibo at kriminal sa Office of the Ombudsman.
Sa reklamo ng dalawang konsehal, pinaboran umano ni Vicencio ang joint venture ng Principal Management Group, Inc. (PMGI) at Serg Construction, Incorporated na binigyan niya ng P122 milyon kontrata para itayo ang bagong munisipyo.
Napag-alaman ng dalawang konsehal na iligal ang ginawa ni Vicencio dahil sa hindi rehistrado ang pangalawang construction firm sa Securities and Exchange Commission (SEC) habang ang unang construction firm ay hindi lisensiyado sa Philippine Contractors Accreditation Board (PCAB).
Mayroon pa umanong iregularidad na ginawa si Vicencio dahil sa hindi ito kumuha ng "approval" sa Office of the President para sa nasabing proyekto na kailangan para sa mga proyekto ng pamahalaan na ang halaga ay lampas sa P50 milyon.
Isang pagpapatunay ang pagpapalabas ng isang sulat mula kay Assistant Secretary Jesus Crispin Remulla ng Presidential Management Staff na hindi aprubado ng kanilang opisina ang nasabing kontrata.
Kaya’t ang dalawang konsehal ay humihiling na suspendihin si Vicencio para hindi nito maimpluwensiyahan ang gagawing pag-iimbestiga ng Ombudsman. (Ulat ni Gemma Amargo)