'Boracay' mansion ni Erap pinaulanan ng bagoong at alamang

Pinagbabato ng bagoong at alamang ng mga militanteng grupong Kongreso ng Pagkakaisa ng Maralitang Taga-Lungsod (KPML) ang tinaguriang "Boracay" mansion ni Pangulong Estrada sa New Manila, Quezon City, kahapon.

Binatikos din ni KPML spokesman Jess Panis ang Pangulo dahil sa umano’y pagkakasangkot nito sa jueteng operations kasabay ang panawagan dito na magbitiw sa kanyang tungkulin dahil sa pagkawala nito ng moral na karapatan para mamuno ng bansa.

May 50 hanggang 100 miyembro ng KPML ang nagsagawa ng kilos-protesta sa harap ng Boracay mansion ni Pangulong Estrada na nasa 100 11th St., New Manila, QC, kung saan ay nakatira umano dito si dating actress Laarni Enriquez.

Inakusahan din ng grupo ang Pangulo bilang umano’y godfather ng mga gambling lords dahil sa pagbibigay umano nito ng proteksyon sa mga sugalan partikular ang jueteng operations sa buong Luzon. (Ulat ni Rudy Andal)