Snatcher knock-out sa ex-world champ

Isang 21-anyos na miyembro ng Batang City Jail na nang-agaw ang cellphone sa isang empleado ng Dept. of Finance, ang pinatulog ng dating boxer champ makaraang manlaban ang suspek sa huli bago nasakote ng mga awtoridad kamakalawa ang gabi sa Harrizon Plaza, Maynila.

Kinilala ng pulisya ang suspek na si Alfredo Briones, ng 246 Estrella st., F.B. Harrison, Pasay City, habang ang biktima ng snatching ay nakilalang si Ryan Maxdell Gajo Tobias, binata, ng 77-C 15th Avenue, Bgy. Socorro, Quezon City.

Batay sa ulat ng pulisya, lumalabas na sinamantala ng suspek ang biktima na nagte-text sa loob ng isang pampasaherong jeep dakong alas-6: 45 ng gabi kamakalawa.

Hinabol ng biktima ang suspek dala ang inagaw na cellphone subalit namataan ito ni William Magahin, ex-WBF World Boxing champion na humabol din sa tumatakas na suspek. Inabutan naman ni Magahin ang suspek subali’t ito ay nanlaban kaya napilitang suntukin sa mukha ni Magahin na nagresulta upang ito ay mapatulog bago dalhin sa presinto. (Ulat ni Wilfredo Suarez)