5 babae sugatan sa pagtalon mula sa jeep na hinoholdap

Limang kababaihan ang iniulat na nasugatan makaraang tumalon palabas ng isang pamapasaherong jeep na hinoldap ng dalawang hindi kilalang lalaki kahapon ng umaga sa makati City.

Kinilala ng pulisya ang mga biktimang nagtamo ng maraming gasgas sa katawan na sina Teresa Vargas, 18; Tricia Lilis, 24; Virginia Salazar, 37; Leonida Benedicto, 40; at Lucinda Fajardo, 34.

Nabatid sa ulat ng pulisya, ang mga biktima ay sakay ng isang pampasaherong jeep na may plakang TJH-517 na minamaneho ng isang nangangalang Boy Castañeda, 27 at may rutang Cartimar/Guadalupe.

Pagsapit ng jeep sa panulukan ng Gil Puyat Avenue sa may Edison St., Makati City ay nagdeklara ng holdap ang dalawang hindi kilalang lalaki na nagpanggap din na mga pasahero.

Dahil sa takot na saktan ng mga holdaper ay nagpulasan ang mga biktima kahit na tumatakbo pa ang sinasakyang jeep.

Namataan naman ng mga nakasaksi sa pangyayari na ang dalawang hindi nakilalang suspek ay sumakay sa nag-aabang na sasakyan sa hindi kalayuang pinangyarihan ng krimen. (Ulat ni Lordeth Bonilla)