Mogasto sa pag-ayo sa truck oval—SBD

CEBU, Philippines — Gitubag ni Shaun Doherty pangu sa SBD Builders ang alegasyon kabahin sa isyu sa Cebu City Sports Center nga matud pa substandard ang mga materyales nga gigamit alang sa pag-ayo niini.

Atol sa executive session nga gipahigayon sa Cebu City Hall kagahapon gipadayag niini ang rason nganong dali nga nangaguba ang rubberized track oval.

Suma pa ni Doherty nga tungod kini sa pagtukod sa grand stage sa tunga atol sa Palarong Pambansa ug gisundan dayon kini sa Pasigarbo sa Sugbo 2024.

“Ang guba ana niya kay naa sa around 400 sqm. But we are going to renovate around 600 sqm kay nakita namo nga naa nay damage ang ubang area kay kana laging atong sports center buhaton og cultural center, madaot gyud siya kay rubber ra baya na. Dili mana pwede paagian og heavy equipment. Ang nangadaot nga area, amo nalang to ayuhon og apil”, esplikar pa ni Doherty.

Dugang niya nga nalangay sab nila og repair ang maong oval gumikan kay wala ma-aprubahan ang ilang gi-file nga insurance claim tungod sa “negligence”.

Sa pagkakaron suma niya nga mogasto sila sa kaugalingon nilang pundo aron maayo lang ang track oval.

Giangkon sab ni Doherty nga nalangay gyud ang pag-ayo sa track oval bisan og nipasalig sila nga ayuhon nila kini sa buwan sa Septiyembre tungod kay sa ikaduhang semana pa sa Oktubre nangabot ang mga materyales nga ilang gi-order gikan sa Taiwan ug China.

Samtang misugyot si Konsehal Joy Augustus Go Young nga mas labing maayo nga sugdan ang pag-ayo sa track oval inig human na lang sa Sinulog tungod kay kinahanglan og pipila ka buwan alang sa “curing” sa pagplastar sa mga rubber. —MEL BANAT NEWS