Unay sa mga sungayan
Kon yak-an sa mga kongresista ang impeachment complaints batok ni Bise Presidente Sara Duterte hangtod sa ilang bakasyon sugod sa sunod semana para sa kampanya sa eleksiyon karong Mayo, dunay duha ka nagkasungi nga mga pagtuo:
Una, moburot ang mayoriya sa administrasyon sa House of Representatives ug Senado maong mapalagpot ang bise presidente sa puwesto liwas sa eleksiyon; ug
Ikaduha, lame duck na si Presidente Ferdinand Marcos Jr. human sa eleksiyon (kay iyang mga alyado dili na maminaw niya kay maglumba na og lumbay sa kinakusgan nga modagan sa 2028).
* * *
Gipasanginlan ang presidente nga sakop sa Agad-Agad Foundation: Grupo sa mga bana nga sige og yango sa ilang asawa ug, sa kaso ni Marcos Jr., sa ig-agaw. Samtang lalisunon pa kon silang First Lady Liza Araneta Marcos ug Speaker Martin Romualdez ba gyoy hawod sa administrasyon, klaro nang ang presidente nag-agad ra sa mga panghitabo:
BFF niyang bise presidente hangtod na-bad shot sa first lady kay nikatawa dihang ginganlan sa kanhi presidente ang presidente nga bangag;
Gisuportahan niyang impeachment hangtod nakumbinser sa Iglesia ni Cristo (INC) nga magkauli pa;
* * *
Gisuportahan niyang 2025 budget hangtod nga nabisto nga apil sa labing gilaslasan og pundo ang mga programa nga gipanghambog sa iyang administrasyon nga labing importante ug dinalian karong tuiga; ug
Gipasidunggan ang Kongreso sa pagtukaw sa mga deliberasyon hangtod nga gisaway ang ilang napasar nga budget nga labing kurakot sa kasaysayan busa napugos sa pagsugo sa iyang anak, Kongresista Sandro Marcos, sa pagpalagpot sa pangabaga ni Romualdez sa maniobra, Kongresista Zaldy Co.
* * *
Nalipay ta nga nabungkag ang UniTeam kay nag-unay ang mga Marcos ug mga Duterte. Gipakaingon nato nga duna nay sukaranan ang paglaom nga magbawosanay sa pagbisto sa ilang mga baho. Aron nga pulos masilotan sa bangis nga mga krimen nga gipasangil ug dunay nitumaw nga lig-ong mga ebidensiya batok nila.
Hangtod nga nakakita ta sa dili malalis nga pruyba sa hagbay rang gipasidaan sa atong katiguwangan: Nga walay mapili sa mga puwersa sa kangitngit ug kadaotan; nga mas maayong kapilian ang paggakos sa kahayag ug hiniusa ug determinado nga pagbarug para sa katarung ug kaangayan.
* * *
- Latest
