Uyab nga badlongon

Dear Tito Miguel,

Ako diay si Yesa, taga Barangay Calamba, Cebu City. Naproblema diay ko sa akong boyfriend nga si RJ kay tapolan kaayo. Sige. nalang og absent sa iyang trabaho. Nagsalig siya nga soud ra kaayo niya ang iyang boss  maong tugtan ra siya nga magsige og absent . Apan tungod sa pagsige niya og absent, daghan pud siya og deduction sa iyang suweldo. Dugay man gyud siya kamata, Kapoyan man siya mobangon og sayo, ilabi na kun lami kaayo siya og tulog.  Daghang rason nga dugay siya kamata, usahay mabuntagan sa pagsige og duwa og ML. Usahay pud kay nadugay og uli gikan laag. Sige ko tambag niya, dili gyud maminaw uy. Unsaon mani nako siya ? - Yesa-

* * *

Yesa,

Kun sige na ka’g tambag apan dili maminaw, pasagdi. Wala na man ka magkulang sa tambag ug pahimangno. Dili na ka mabasol sa umaabot. Kun wala paka kabantay, nakakaplag ka’g uyab nga wa’y buot. Dili seryoso sa trabaho, iresponsable. Nalingaw pa siya’g laag ug duwa. Bata pa siya’g hunahuna.

Sa laktod, mora ra ka’g inahan nga sigeg badlong kaniya, apan dili maminaw ka’y nagsalig nga magkina-unsa imo gihapon dawaton ug panggaon. Busa ayaw na’g badlong ug pahimangno. Sa maong paagi siya mahibulong ngano kalit ka nahilom. Basin diha pa makaamgo.

Kun mangutana’g ngano, ingna nga dili man siya maminaw, imo na lang siya pasagdan sa iyang batasan. Ingna pagtagbaw sa iyang lingaw, paaboton na lang nimo nga siya mapul-an ug mahamtong. Mahimo gihapon mo magpadayon, apan paniid kun duna’y kausaban.

Ka’y kun siya kanimo tiunay, ma-alarma unta siya ngano wala na ka’y pakialam sa iyang batasan nga sa una imong gireklamohan. Diha nimo siya masukod kun seryoso ba siya kanimo. Ka’y mahimo man dili seryoso sa trabaho, apan kanimo sigurado. Kun kanimo wala gihapo’y klaro nga plano, angay na ka magduha duha. Kun magdayon mo, basin duna na ka’y kamaguwangan maski wala pa ka namabdosan. 

-Tito Miguel

Magpatambag ka? Ipada kang Tito Miguel: 0991-318-9366