NorthPort mipahayag sa Top 2 nilang misyon

CEBU, Philippines — Ang NorthPort mipalig-on sa ilang kampanya nga makaangkon og luna sa Top 2 nga dunay twice-to-beat advantage sa PBA Commissioner's Cup playoffs.

Kini human ang Batang Pier nakaipsot San Miguel Beermen, 105-104, sa kulbahinam nilang sangka niadtong Martes sa gabii didto sa Ynares Sports Center sa Antipolo City.

Nag-agi og makuyaw nga dalan ang NorthPort gumikan kay mikolapso sila human milabaw og 24 puntos sa ikatulong kuwarter.

Apan si Kadeem Jack misalida sa panahon nga siya labing gikinahanglan aron tabangan ang Batang Pier nga maka-eskapo ngadto sa usa ka lugas nga kadaogan batok sa Beermen.

Si Jack mipatuasik og 38 puntos apan ang iyang pagkamabayanihon maoy labing mahinungdanon.

Si Arvin Tolentino mipupo og 22 puntos samtang sila si Will Navarro ug Joshua Munzon nagkumboya'g  29 puntos alang sa NorthPort, nga nagtabla na karon ug ang Converge FiberXers sa ikaduhang dapit sa liderato uban ang managsamang 8-3 nga baraha.

Samtang ang Beermen nagpabilin sa ikawalong puwesto nga ila nang gisaw-an uban sa Magnolia Hotshots ug NLEX Road Warriors bitbit ang parehong 4-6 nga baraha.