No label relationship

Dear Tito Miguel,

Maayong adlaw , ako diay si   Alywiname , taga Cordova Cebu.  Duna ko'y ka-MU (mutual understanding) karon , ug tulo ka buwan nami sa ingon niini nga sitwasyon.  Siya diay si Benjie nga taga Barangay Guadalupe, Cebu City . Hangtod karon, nalingaw rami sa among "no label relationship ". Sinabotan man sad ni namo aron dili mi ma-pressure. Bisan pa man sa ingon niini nga sitwasyon, kusog kaayo magselos si Benjie basta dunay magparamdam nako nga laing lalaki. Dili siya ganahan nga mo-entertain ko og laing lalaki. Sa tinoud lang, ganahan sad baya ko ni Benjie ,pero lain man sad paminawon nga ako ang mobuhat og move aron hingpit na gyud nga maporma ang usa ka formal relationship . Sa akong paminaw , mura'g nalingaw ra gyud si Benjie sa "no label relationship ". Wala man pud siya'y laing gikalingawan nga babaye. Unsa akong buhaton Tito Miguel ?  —Alywiname

* * *

Alywiname,

Aron maklaro nimo unsa gyud iyang  plano nimo, pangutan-a ini’g pangabubho niya, unsa man diay tang duha? Ang dunay katungod magselos ang manag-uyab ra o magtiayon. Busa kun dili siya ganahan dunay laing lalaki nga kanimo magparamdam, klarohon niya unsa mong duha. Kay lagmit dunay laing moduol nimo tungod kay wala man moy klaro kun uyab ba’g managhigala lang.

Pero ayaw pugsa. Ingna lang nga klarohon niya, kun duna ba mo’y mapaabot sa usa’g usa. Kay kun wala, biya na samtang sayo pa. Mahinayak unya imong buot ug pagbati, unya diay siya dili seryoso kanimo. Alkanse ka.

Hinuon, inyo nang gisabotan. Apan ingna siya nga ang iyang pangabubho nakapa-usab sa inyong sabot ug sitwasyon. Sa laktod, uyab mong duha apan dili ninyo angkonon sa pangalan. Unsa gud na, inyong pagtagad ug pagbati sa usa’g- usa mura’g uyab apan dili mo uyab. Pressure sa unsa. Tanang matang sa relasyon duna’y pressure. Karon gani na pressure na ka sa iyang pangabubho. Kun magpadayon mo sa inyong set-up, tabla ra nga inyong kaugalingon inyong  giilad.  —Tito Miguel

Magpatambag ka? Ipada kang Tito Miguel: 0991-318-9366