Dunganon sa pagtumba
Giawhag ang mga grupo nga nag-apura sa pagkiha ni kanhi Presidente Rodrigo Duterte (kay wala pa man g’yud siya ipadakop sa International Criminal Court (ICC) ug pag-impeach ni Bise Presidente Sara Duterte sa dili pagpalabi og saway sa pagmaniobra sa administrasyon ni Presidente Ferdinand Marcos Jr. sa 2025 budget.
Gipasidan-an sila nga gisakyan sa mga Duterte ang eskandalo sa budget aron makaikyas sa responsibilidad sa pagtubag sa mga krimen nga gipasangil batok nila pinaagi sa pagkumbinser sa publiko nga mas dakong kawatan silang Marcos Jr. ug House Speaker Martin Romualdez.
* * *
Ang sukaranan sa awhag, nga gipaluyohan sa pipila ka pundok nga tinuod nga nagpakabana para sa kaayuhan sa nasud, mao nga dili mahimong dunganon sa pagtumba ang dinastiya sa mga Duterte ug ang administrasyong Marcos. Giisip nila nga mas dakong hulga ang mga Duterte.
Maong nitambag sila nga tutokan ang mas dagkong kawat nga gipasangil batok nilang Marcos ug Romualdez kon mahipos nang mga Duterte. Kay mahimong mapilde ang tanang paglaom sa makiangayong kausaban kon, simbako, layo ra to, tabukon og pito ka lawod, makabalik ang mga Duterte sa Malakanyang.
* * *
Nabalaka sila nga kon tinud-on sa paglatigo ang administrasyon mahimong maluya ang ilang kampanya sa pagpahuyang sa mga Duterte sa eleksiyon karong Mayo ug sa pag-inutil nila sa mas importanteng eleksiyong presidensiyal sa 2028.
Nahadlok sila nga ang budget scandal, pun-an sa rally sa Iglesia ni Cristo (INC), kalangay sa impeachment ug ka walay klaro kanus-a luwatang arrest warrants sa ICC, makapabaskog pagbalik ug makahimong mas bagis sa mga Duterte.
* * *
Mangahas ko og puypoy sa ilang mga kabalaka:
Bisan sa budget scandal, takos gihapong House of Representatives sa dinaliang pag-impeach, ug ang Senado sa pagkonbikto, sa bise presidente;
Dili makaayo nga ikumparar kinsay mas dako og atraso nilang Marcos ug Duterte kay angayng batokan ang tanang kawat ug krimen bisan kinsa pay responsable; ug
Kon maamguhan sa mayoriya nga walay mapili nilang Marcos ug Duterte, kon mohukom sila sa pagdungan sa pagsalikway sa duha ka higanteng mga dinastiya ug sa ilang mga alyado, dili makadaot sa nasud ug katawhang Pilipinhon ang hiniusang paglihok sa pagbawi sa gahom sa pagpanimon sa atong kasaysayan.
- Latest
