Uyab nga kusog mangluod

Dear Tito Miguel,

Maayong adlaw ,ako diay si Mark J , taga Barangay Guadalupe ,Cebu City. Naproblema ko sa akong girlfriend nga si Michelle kay dali ra kaayo mangloud. Gamay nga butang ,mangloud dayon. Makaingon sad ta ba nga ka-immature sad ani niya uy. Example , dugay rako mauli ,mangloud dayon bisan nihatag nako og klaro mga rason. Kun dugay ko ka-reply sa iyang chat ,mangloud dayon . Kun magsagunson ang laag nako sa akong barkada,mangloud dayon kay mas naa daw ko pinalabi nga mga tawo. Bout huna-hunaon, mas siya ang akong gipalabi kay halos taga adlaw mi magkuyog . Unsaon mani nako siya ? — Mark J

* * *

Mark J,

Ang luoran kay  ubos ang panan-aw sa kaugalingon. Kinahanglan am-aman aron makumbinsir niya iyang kaugalingon nga siya gipangga, gimahal ug gipangita. Ang nakapait ka’y maski unsa na lang pangluoran. Kuwang sa tagad ug pagsalig. Apan wala’y katagbawan maski gihatag na nimo tanan. Dili siya makabugtong, mahadlok mag-inusara. Mao kini ang imong uyab.

Wala ka maghisgot mag-unsa siya kun mangluod, dili motingog, daw wala makakita nimo o mopalayo. Kining tanan maoy iyang pamaagi sa pagpatagad. Kun makita nimo nga duna sad siya’y katungod o rason mangluod, tagda’g am-ami. Kay ikaw man ang dunay pagkukulang. Apan kinahanglan sinsero ka, ayaw pugsa imong kaugalingon. Pero’g sa tan-aw nimo wala na siya sa lugar, pasagdi. Ang pag-am-am kinahanglan natural, ayaw pugsa aron lang mo magmalinawon. Kay kun imong pugson, masulod ka sa laang. Iya na ka patuyok-tuyokon.

Kun dili motingog, ayaw istoryaha. Kun daw wala makakita nimo, biyai. Kon dili magpakita nimo, pasagdi. Tan-awa, di ba siya ra gihapon ang mo-surrender. Sa hinay hinay siya makaamgo nga dili ka niya kontrolado. Kun mohilak, ayaw padala. Ang luha usa ka armas pagkontrolar kanimo. Dunay mga tawo, dili lang babaye, ang dramatorgo. Karon kun way  kausaban, mangluod gihapon maski wala sa rason, kinahanglan na ka magduha-duha’g mopadayon pa ba. Hunahunaa kuno’g dili ba ka kapoyon kun kamo magdayon, mata’g karon ug unya, sige lang ka’g apas ug tagbaw sa iyang mga panginahanglan nga wala’y kabusganan.    

Magpatambag ka? Ipada kang Tito Miguel: 0998-581-5856