Naadik sa online shopping

Dear Tito Miguel ,

Ako diay si Aljun ,taga Consolacion ,Cebu,na-stress  gyud ko sa akong girlfriend nga si Alma kay  naadik sa online shopping. Bisan unsa nalang ang pamaliton ,bahala'g dili importante ,order gihapon. Kapila nako og sige'g tambag nga dili magpalabi kay kalas kaayo og kuwarta , dili gyud mopatoo.  Bahala nalang og makautang siya ,basta maka-order lang . Unsa angayan nakong buhaton Tito Miguel ,aron mopatoo siya sa akong tambag ? — Aljun 

* * *

Aljun,

Lisod na nimo pakgangon, mao na iyang kalingawan. Gani, na-addict na siya’g pamalit. Shopaholic. Wala’y dautan kun sobra iyang kuwarta. Pero’g mangutang na, angay na badlongon. Apan gahi na’g ulo kay na-addict lagi. Inay nga imong wagtangon, kuhai lang gamay. Ipakuwenta pila iyang  income matag buwan. Unahon ang tanan nga importante labi na sa pagkaon, gasolina o plete, tubig, kuryente, load, Wi-Fi o abang ba kaha.

Kun dunay sobra, agniha nga tungaon sa iyang shopping ug tigom sa banko alang sa inyong kaugmaon. Ingna nga magtigom ka’g imo, magtigom siya’g iyaha, unya inig Pasko, inyo itandi kinsay mas dako’g natigom ninyong duha. Ang gamay ra kinahanglan motapal sa iyang alkanse. Sa maong paagi, malingaw mo, maghinam-hinam kinsa kaha ninyo ang makatapal samtang inyong kuwarta nahipos ug nagtubo sa banko. Apan ayaw ninyo sagola, kay inig buwag ninyo, lisod na bahinon. Kun mosugot ug motuman sa inyong kasabotan, siya nareporma apan wala hingpit nga nahikawan sa makalingaw niya. Total, kuwarta ra man kaha niya. Kun mosugot apan gamay ra’g natigom ug dili pa gyud motapal sa iyang kuwang, dili siya seryoso kanimo. Kaugmaon na gud ang inyo gipangandaman, nganong dili man siya maninguha. Kun dili mosugot ,buot pasabot wala siya’y plano mokuyog nimo. Kun duna man, basin dili mo pareho’g gipangandaman. Gani, iya untang  ikalipay nga nisugyot ka nga mangandam sa inyong ugma, buot pasabot naa ka’y plano nga siya pakaslan. Kun mao, wala’y bili kaniya imong plano ug ikaw mismo. Tito Miguel

 Magpatambag ka? Ipada kang Tito Miguel: 0991-318-9366