Dili kaaribal

Dear Tito Miguel,

Maayong adlaw , malingaw gyud ko sa imo column kay daghan ko og makat-onan.   Ako diay si Clarisse , taga Sitio Sandayong,  Barangay Guadalupe, Cebu City.  Maglagot ko maghuna-huna , ang ex-girfriend sa akong boyfriend kay guwapa man kaayo uy. Insecure bitaw ko , kay basin anytime ba, makuha niya og balik ang akong uyab. Grabe kay ko mag-overthink ay. Unsa akong buhaton, para makabaton  nako og peace of mind?--- CLARISSE

Clarisse,

Undangi’g hunahuna ang dili nimo kontrolado, sama sa kaguapa sa ex sa imong uyab ug sa posibilidad nga magbalik sila. Wa kay mahimo kun siya guapa o bati. Gani, basin ikaw ray ni ingon ma’s guwapa siya kanimo. Ikaw ang present, dunay nakita imong uyab kanimo nga wala didto. Matud pa, ang kaanyag naa ra sa mata sa nagtan-aw. Ikaw mismo nakakita’g guapo apan wa kay gana, dili type nimo. Naa sad kay kaila mahibulong ka, ilang giuyab apiki ma’g nawong. Sa imong panan-aw. Apan didto nakita nila ilang gipangita. Busa ayaw ikumpara imong kaugalingon sa uban, duna gyud labaw ug ubos nimo. Apan sa tawo nga nagmahal kanimo, imong hitsura igo na kaayo.

Ngano hadlok man ka magbalik sila? Duna pa sila’y koneksyon? Ang iyang ex single gihapon? O nagmugna lang ka sa imong imahinasyon? Kun magbalik gyud sila, wala kay mahimo. Sakit, apan buot pasabot dili siya ang para kanimo. Kun dunay laing gusto imong uyab, ayaw pugngi, tabla ra nga namugos ka. Kun imo awayon, posible dili siya mopadayon. Apan iya’ng gusto dili na ikaw, lain na unta, imo lang gipugngan. Buot pasabot dili tibuok iyang gugma kanimo. Kay kun tiunay pa, di na mangita’g lain maski guapa pa nimo. Busa ayaw na kahadlok sa mga butang nga wala sa imong kamot, ang pagtagamtam sa inyong relasyon basin ka makalimot. Kun mangita gyud siya’g lain, posible lahi pa nga babaye. Ang ex dili nimo karibal, kun dili ang imong imahinasyon nga mora’g karnibal.   —Tito Miguel

Magpatambag ka? Ipada kang Tito Miguel: 0998-581-5856