Last chance

Dear Tito Miguel,

Maayong adlaw! Ako si Melanie, taga Banawa, Brgy. Guadalupe, Cebu City. Grabe kay ko mag-overthink ay, ug mao kini ang rason nga magsige mi og away sa akong boyfriend nga si Jan Mark. Naa man siya'y history nga kusog kaayo mangabit. Nag-usab na daw siya , pero hangtod karon, permi ko magduda nga nagpadayon gihapon siya sa iyang batasan nga mangabit. Unsa akong buhaton Tito Miguel?—Melanie

Melanie,

Imong paghunahuna ikaw ra’y maugtas. Dili kini makapugong kun unsa iyang buhaton. Kun dili gyud nimo mapugngan imong imahinasyon, susiha imong kaugalingon, andam ba ka moagwanta sa pagduda, mopasaylo kun imong gikahadlokan mahitabo na? Kun dili, buwag na, aron duna na kay kalinaw. Kun imong uyab nibudhi kanimo kadaghan kaniadto, lagmit iya kini usbon maski gimahal ka niya. Siya ang matang sa tawo nga nahigugma sa usa apan mangita’g lain nga lingaw kay kanimo dili matagbaw. Dili ni siya makunsensiya, kay tiaw-tiaw ra para niya. Dili magbag-o, unsa may usbon nga para niya iyang binuhatan insakto man. Pananglit magbag-o, igo ra na nagpabugnaw o dili ba kaha mas maayo na motago.   

Dunay pipila ka babaye nga modawat niini, sila ang asawa’g gipakaslan, apan ilang bana dunay laing babaye. Basta lang kumpleto ilang panginahanglan ug ini’g gabii sa iyaha mag-ulian. Mao ni ang matang sa babaye nga haom sa imong uyab.

Kun dili ni ikaw, biya na. Kay maski unsaon nimo’g duda, imbestiga, away, pugong ug guwardiya, mangita gyud na’g higayon nga makaipsot gihapon. Lisod tuohan, apan dunay mga lalaki nga matinud-anon, dili nimo kinahanglan giyahan o baharan, sila mismo mobuhat sa insakto. Kini ang para imo. Dili ang lalaki nga di ka mosalig kay di kasaligan. Way padulngan inyong relasyon, di ka malipay, sige ra ka’g matngon. Kun gihigugma nimo siya, hatag sa kataposang higayon. Apan ayaw na’g duda ug imbestiga kay di lagi na makapugong niya. Ang kamatuoran mopatim-aw ra’g iyaha, maski wa ka mangutana.  Tito Miguel

Magpatambag ka? Ipada kang Tito Miguel: 0998-581-5856