Lingia siya isip kasinatian

Dear Tito Miguel,

Ako si Sam. Unsaon nako pagkalimot sa akong unang lalaking gihigugma? Bisag unsaon nako mosulod gyud siya sa akong utok. First boyfriend nako siya,  three years and 11 months mi nag-uyab. Natapos ang tanan tungod sa iyang sakit nga brain tumor. Palihog tambagi ko. —Sam

Sam,

Lagmit imo pasabot sa natapos ang tanan kay siya nitaliwan. Karon ang imong suliran unsaon nga siya imong makalimtan. Ayaw pugsa imong hunahuna’g kasingkasing nga makalimot dayon niya. Lisod malimtan dayon labi na kay first love nimo siya ug taud-taud sad mo nagkuyog. Busa natural nga mingawon ka’g maghandom niya. Panahon ra ang makatubag kun kanus-a siya mapapas sa imong memorya. Aron dili ka sakitan inig mahinomduman nimo siya, pilia ang mga tam-is nga handumanan aron mopahiyom ka sa ilawom.

Apan inay nga magdahom ka nga ibalik ang kagahapon, ipasalamat nga nakakaplag ka’g sama niya nga nakigsawo nimo sa gugma ug himaya. Gani, arang-arang pa imong kahimtang kumpara sa uban. Buhi tuod ilang gihigugma apan sila giilad, gibudhian, gibiyaan ug gibaylo sa uban.

Mas sakit kay gipili sa buhi nila nga uyab nga sila pasakitan. Apan imong uyab wala mopili sa iyang kamatayon nga maoy bugtong hinungdan nga kamo niabot sa utlanan. Ayaw pugsa’g undang imong pagbangutan. Imong kasingkasing dili madiktaran. Apan ayaw pag-inusara. Pangita’g ka-istorya, pamilya o suod nga higala. Mahimo ka makigkita sa imong mga higala aron ka malingaw.

Ayaw panirado sa imong kaugalingon nga makahimamat sa uban. Tinuod, anugon ang imong first love. Apan kasagaran primerong uyab dili maoy kataposan. Igo ra sila mohatag nimo’g leksiyon. Maski buhi pa imong uyab, walay garantiya nga kamo magdayon. Busa lingi niya isip kasinatian, dili imong ugma ug kataposan. —Tito Miguel

Magpatambag ka? Ipada kang Tito Miguel: 0998-581-5856