Gi-block kay toxic

Dear Tito Miguel,

Plastic kaayo among silingan uy! Gi-block ko niya sa facebook, pero kun magsugat mi, motagad siya nako. Mora ra'g walay nahitabo.  Few days ago before ko niya gi-block, nagpost siya nga dili kuno dapat ma guilty sa pag-let go og mga tawo nga dili makaayo sa mental health. Nya giblock manko niya, gi let go ko niya, ngano managad paman siya'g magsugat mi? —Dyna

Dyna,

Managad gihapon siya kay plastic man, ikaw ra mismo niingon sa sinugdanan. Sa iya’ng pag-block nimo buot pasabot iya na unta giputol tanan ninyo connection. Apan kay silingan man mo, di malikayan nga magsugat mo sa dalan.

Usahay sab ang pagtagad dili gyud plinastik, kun dili gidiktahan sa maayong pamatasan. Kay usahay mabastos man sad ka kun di ka managad, kay mora ra ka’g nangaway sa hilom. Gani, lagmit ikaw nibawos niya’g tagad. Sama ra gud sa buhat sa mga pulitiko.

Wa ka maghisgot unsa imo’ng kasagaran gina-post. Basin duna’y kalambigitan sa pulitika o relihiyon nga sukwahi niya. O dili ba kaha wala lang siya kauyon sa imo’ng gipangsabwag sa social media, mao nga para niya toxic ka.

Busa duna’y posibilidad nga sa social media lang niya giputol inyo’ng connection. Basin para niya ma’s maayo di siya kakita, inay nga sapoton sa imo’ng mga post. Mao nga managad siya sa personal, pero gi-block ka sa virtual. Daghan na’y nibuhat ana aron molikay sa gubat nga wa’y hinungdan. Kay dili ba ang social media aron unta ang tanan managhigala? Apan posible usab sa imo’ng mga post wala siya’y problema, kun dili ikaw mismo iya’ng kontra.

Ang maayo nimo buhaton ayaw ipakita nga apektado ka niya. Ayaw’g hisgot niya sa uban labi na sa social media. Kay mao na iya’ng tumong ug tinguha. Kun di na ka ganahan niya ug di ka kaako makigplastikan, ayaw tagda. Apan kun siya mouna’g tagad, hatagi la’g insakto’ng tubag.   —Tito Miguel

Magpatambag ka? Ipadala sa Banat News FB page…