Si Badong ug ang batang kulot

May duha ka tawo nga nagsakay og motorsiklo ang milutos kang Badong. Busa puwerte na gyong sutoya og dagan ni Badong. Ug samtang nagdagan siya, namalikhaw sa iyang panumdoman ang iyang pagka drug pusher apan misurender na man siya og nagbag-o na. Ang iyang mga kauban nga sila si Samuel, Bakang ug Aldong nagsige pa gihapon. Mao bitaw nga si Bakang puwerteng pataya dihang gipusil og duha ka tawo nga nagsakay og motorsiklo ug nagsul-ob og bonnet.

Unya kalit lang napugwat siya sa iyang paghanduraw dihang may batang kulot nga kalit lang midam-ag kaniya ug nahagba silang duha. “Ayaay, ayaaaay, Kuya, dili ko makabarog dad-a ko sa sulod simbahan,” hangyo sa bata. Gidali dayon ni Badong pagsakwat ang bata ug iyang gidala sa simbahan.

“Okey na ko, uy, Kuya. Nalugpitan lang tingali ang ugat,” sa batanng kulot nga milingkod tupad kang Badong. Unya sa paglingi ni Badong maoy iyang nakita ang duha ka tawo nga milutos kaniya. Midali siya’g tindog ug mipaingon sa may shrine ni Santo Niño, ug kay daghan pa man ang mga tawo nga nangaliya, misulod na lang siya sa adoration chapel.

“Badong, nganong nahadlok ka man, puwerte nimong nakadagan. Wala mi daotang tuyo nimo. Mga polis mi. Ako si SPO2 Samuel. Gipangita ko ikaw aron pagpasalamat sa pagtabang nimo sa akong anak nga dalaga nga gilabnotan sa iyang cellphone. Imong gilutos ang snatcher ug gikuha mo’g balik ang cellphone sa akong anak. Mahalon ra ba tong selpona. Salamat, ha, Badong. Sayod kong nagbag-o ka na, Badong, ug wala ka na mag-apil-apil anang pagpayuhot sa mga ginadiling drugas nga shabu...” Ug nanggawas sa adoration chapel ang duha ka polis.  Ingon sa nahuwasan si Badong ug migawas pud siya ug milahos didto sa may shrine ni Senyor Santo Niño, ug didto, nahatutok si Badong kay ang hitsura sa Batang Balaan sama gyud sa hitsura niadtong batang kulot nga iyang nadasmagan kaganina sa iyang pagdagan.

Ug dinhi nangaliya si Badong, “Senyor Santo Niño, maayo kay imong gituyo nga mahasulod ko dinhi sa imong simbahan, ug salamat kaayo, Senyor, Pit Senyor!” (Kataposan)