Tinuod nga hinungdan

Domingo. Alas dos sa hapon. Nagbasabasa og Banat News si Digna samtang naglingkod sa pantawan sa iyang balay. Wa pa siya’y ganang manarbaho kay wa pa nahurot iyang tinigum sa bali’g upat ka tuig niyang trabaho isip maid sa magtiayong Berio-Dina sa silingang barangay. Apan nakatrabaho siya’g tulo ka adlaw sa batan-ong magtiayon nga anak ang babaye sa suod nga higala sa iyang iyaan.

“Oy, Digna! Naunsa man ka nga imo man kong gipakauwawan? Maayo nakong pasalig nga responsable ka ug kamao sa tanang trabaho sa panimalay. Unya nigawas ka man lang dayon. Nga nagkinahanglan man kaayo og katabang ang batan-ong magtiayon tungod sa kabisi nila sa ilang negosyo. Wa ka may konsiderasyon!” sa Tiya Maura ni Digna, sa tuno nga nanudya.

“Pasensiya na lang Tiya. Maayo unta og gawi ang batan-ong magtiayon. Apan wa ko kauyon sa ilang gipuy-an,” ni Digna. Niyahat. Niundang og basa. “Ha? Unsa man diay ilang gipuy-an?” sa iyaan. “Katulong andana nga apartment. Ang hagdan mora’g fire escape. Unya ang hayhayan sa mga linabhan tua sa atop. Init kaayo. Mahadlok ko masunog akong aping nga may papuwa nga akong gipamutang. Unya, hibawo baya ka nga buwag ko’g bana. Ang akong iring-iring di kalugar og adto. Kay guwardiyado ang gate sa apartment,” ni Digna. Nipahiyom. Gibutang ang mantalaan sa lantay sa iyang tuo. “Dayon una tiya,” ni Digna. Nisaka ang bisita ug nilingkod atbang ni Digna. “Giunsa man nimo sila’g balibad?” sa Tiya Maura niya.

“Ako lang giingnan di ko mopadayon og trabaho. Kay maikog ko nila. Dako ko’g suweldo unya minus ra’g trabaho. Laayon ko,” ni Digna. “Kataw-anan anang istoryaha’’ ni Tiya Maura. Nakatawa gyud. Namid-ok si Digna. “Lisod man kon sultihan nako sila’s tinuod nga hinungdan. Di ko gusto mopasakit sa ilang balatian,” ni Digna. “Tungod sa imong kaasyosa, tan-awa unya. Gabaan ra ka. Makaamo ka ra unya og salbahis!” ni Tiya Maura. Nitulisok ni Digna. Dayong tindog. Nanaug nga way panamilit. Napatiurok si Digna nga nisunod og tan-aw sa iyang iyaan nga nanaug ug nagkalayo na sa iyang panan-aw.