Dilikadisa

 “Naunsa ka ba Lenlen? Nga mora’g kunsabo ka man sa nangutang, dili sa giutangan! Ni Celsa, pagsulod niya sa pultahan sa iyang balay. Iyang bana nga si Novie, nagdiskarga pa sa sakyanan sa ilang mga kinompra.

Ning sayong kagabhion, napikal dayon si Celsa sa iyang katabang nga gibilin niya sa tindahan niyang sarisari samtang nangompra siya. Gitunolan siya ni Lenlen og P1,500 cash bayad sa utang ni Gary, pag-umangkon ni Celsa. Pasuklian kuno’g usa ka gatos kay nibayad na si Gary. Ug si Gary ray nisumada sa iyang utang kay gilaksi na sa notebook ang mga pahina diin ang balig tunga sa bulang konsumo ni Gary nalista.

“Nagdali man gud si Gary, nang Celsa kay dunay lakaw. Namugos man gyud siya nga maoy mosumada sa iyang lista kay mobayad dayon siya,” ni Lenlen. Inosente sab kaayo’g nawong. Probinsiyanang dalaga. Ug nagduda siyang may crush ni Gary. “Ikaw gyud untay mosumada. Kun dili, gihuwat gyud ko nimo.

Asa man ka anang paagiha nga ang customer nga nangutang maoy mosumada sa iyang utang? Iya gyud nang sayopon aron makaminus sa bayranan.”

“Kun may delikadisa pa ka Lenlen, dili nimo ipasumada sa customer ang iyang  utang. Ikaw guy akong gipiyalan. Ikaw mosumada,” ni Celsa, samtang nagsumada ibabaw sa talad kan-anan, sa utang sa pag-umangkon. Nagbarog lang si Lenlen nga nagtamod sa gibuhat sa amo. “Ang iyang bayranan, P1,350 ra. Suklian siya’g P150. Ang sayop ni Gary, pabor nato.

Apan wa gyud ko malipay sa inyong gibuhat. Ayaw na og usab og piyal sa customer nga maoy mosumada sa iyang utang. Mao nay giingon nga conflict of interest. Kinahanglang magbaton og delikadisa ang kustomer. Ikaw sab, ayaw na pagsugot sunod higayon”, ni Celsa. “O, nang Celsa. Di na mausab”, ni Lenlen.  “O. Ihatag ngadtong Gary ang sukli”, ni Celsa. Nidali og dawat si Lenlen sa gitunol nga papel de banko. Nidalig gawas si Lenlen. (Kataposan) Alcea Maningo - Cangyan, Carmen, Cebu