Dili na uso

Nakamatikod man ko nga wa man gyud kay gana mopaamin ni Perla, ang kapuyo ni Greg, akong pag-umangkon”, ni Celsa ngadto’s iyang bana nga si Novie. Nag-abot sila sa balay ni Helen, ig-agaw ni Celsa, nga nagsaulog sa iyang birthday. Panihapon ang hikay. Nauna og abot sila’s Celsa ug Novie. Nagsugod na sila’g kaon pag-abot nilang Perla ug Greg. Uga kaayo ang hitsura ni Novie pagbira sa iyang kamot ni Perla aron aminan. Napugos lang siya’g paamin kay niamin man og una si Greg.

“Kiwawan man god ko. Kini laging nagtubo ko diin ang mga kasandurot nakong magtiayon puro kasado”, ni Novie. Nitusok sa tinidor og gamay’ng hiwa sa humba sa iyang plato. Nahatutok si Celsa sa iyang kapikas.

May negosyo nga karenderya ang magtiayon. Sayo silang manira karong adlawa tungod sa imbitasyon. Ug naminus sab ang customer kay way klase. Semestral break man karong semanaha.

Gawas pa, nagduda si Novie nga gipaangkon lang si Greg sa gisabak ni Perla. Kay tulo na ka babaye ang gikapuyo ni Greg. Way usang nabuntis. Kay bisyoso og shabu si Greg ug kadaghan na narehab tungod sa pagkaadik. Ka-afford man siya sa bisyo, libre pa ang mga barkada, kay pinadalhan man og kuwarta binulan gikan sa America, diin iyang mama Edna nagtrabaho isip domestic helper. Anak si Greg sa pagkadaga sa iyang mama. Wa nagtinarong og eskuyla tungod sa kabuhong sa salapi nga dili niya pinatuloan og singot.

Pagkasayod ni Perla nga pensiyonado iyang kapuyo, niundang siya’g trabaho isip sekretarya sa mayor sa ilang lungsod. Nag-abot ang puro tapulan. Usa sab ni nga hinungdang way gana si Novie motagad sa pag-umangkon sa iyang kapikas.

“Unsa may maayo nakong buhaton? Aron di ka na kiwawan?” ni Celsa. “Di na man ron uso ang amin-amin. Ingna na lang si Greg nga di na paaminon nako. Aron di mosunod og amin iyang kapuyo. Hilasan ko” ni Novie. “Nahala, kun maoy imong gusto” ni Celsa. Nipadayon sa pagkaon. Alcea Maningo - Cangyan, Carmen, Cebu (Kataposan)