Bakakon ka

Bakak ang tanan. .Ang tanan may utlanan, ang utlanan

Gikoral sa mga luha. Basa ang libro nga gikuptan

Sa atong mga damgo. Duna ba goy damgo nga inig

Mata magbilin og mga luha? Asa ka man mangita’g

Luha nga kinamayan ug unya paratparat og gamay kay

Gitimplahan mo’g saad ug gihugawhugawan mo’g mga panumpa?

Dihang milupad ang buyog nga nagdala’g sulat wa mo

Basaha ug kini nagisi hinuon pagbunok sa ulan,

Gugmang bakak, oo, gugmang bakak.  Kini ang unod

Nga nagkulit og handumanan. Kini ang litra nga gilitok sa hangin.

Kini ang dulom nga gabii nga nag-itos og dili mahubit nga kapakyasan.

Sa adlaw sa imong pagbalik, gipanumpa ko

Nga dad-on ko sa bul-og sa suba

Ang mga bakak mong mga panumpa, sahi ra nga gihimo

Mong duladulaan ang mga gapnod nga nasangit

Sa nagpaanod nga water lily ug sila biktima

Sa bakak mong gugma...

#HUGOT

Nahigugma ka na ba? Nagpuyo ka ba sulod sa usa ka matam-is nga relasyon? Napukan ba ang imong paghigugma? Giluiban ka? Gibiyaan?  Nagmaoy ka ba? Mibalik ba ang binuhat nga nagpapitik sa imong kasingkasing? Puno ka ba sa inspirasyon? Gikilig? Bisan unsa pa man ang imong gibati karon, angayan nimo ka na nga ipabuhagay pinaagi sa pagbalak!

Ug sa dili madugay, ang inyong kinaham nga Banat News Kalandrakas, mumantala na nianang maong BALAK nga namugna gumikan sa kalipay ug kasakit nga nasinati human ka nahigugma, gihigugma ug buot mahigugma.

Ipadayag ang imong HUGOT sa gugma! Ipadala   pinaagi sa pag-like sa atong Facebook Page nga: Banat News. Didto ninyo ipadala ang inyong mga HUGOT BALAK sa gugma. Mahimo sab nga pinaagi sa snail mail:

HUGOT BALAK

C/o Banat News  V. Gullas St., cor. D. Jakosalem St.  Barangay Santo Niño 6000, Cebu City,  Philippines