Dili diay komplemento

Wa pa gyud ta kadiyaming attorney no? ni Frank ngadto ni Atty. Rudy Gabucan pagsulod sa abogado sa Palace of Justice, sa Mandaue. Niurong ang abogado og lakaw nilingi ni Frank nipahiyom.

Di na mataha si Frank sa abogado kay hingamigo ug matinagdanon si Atty. Gabucan labing lahi sa tanang abogado. Gipahinumdoman lang niya ang abogado kay usa ka buntag (subra tuig na tingali ang nakalabay) dihang nagkantakanta si Frank samtang nag-mop sa sawog sa CR sa lalaki, nisulod ang abogado kay mangihi. "Nindota gud nimo'g tingog bay! Mura'g praktisado man ka's videoke," sa abogado. Hilig gyud hinuon ko'g kantakanta sir" ni Frank sa malumong tingog. "Imbitahon unya tika'g dyaming kun may lugar," sa abogado. Unya nag-ila-ila sila.

"Sumala ba karong huma'g paniudto naay kan-anan sa atbang nakadungog kong may videoke maniudto ta. Inig ka human manganta ta hangtud ala una," sa abogado nga mapahiyumon. "Agad lang ko nimo Attorney," ni Frank. "Huwata ko kay inig human sa bistang akong tambongan dyam dayon ta," sa abogado nisulod sa pultahan sa RTC branch 55.

Wa lang kaayo nituo si Frank kay diyanitor ra gud siya kuli kaayo nga may abogado makigbarkada niya.

Naglingkod si Frank sa guard house pagka-alas onse human na tanan niya'g limpiyo iyang mga limpiyohanan. Pagkataudtaod, " Frank! adto na ta," sampit sa abogado.

Didto sila sa Green Meadow Eatery, ni-order ang abogado og linat-ang manok ug kalderita para nila. Ug gipadugang si Frank kun unsay iyang gusto. Pagkahuman nila'g kaon nihiklin sila's daplin sa habagatang habig sa kan-anan, diin tua mamuntar ang videoke.

Wa nikanta og iningles si Frank kay mahadlok mabisto nga wa siya kahuman og hayskul matataw unya sa diction. Nakadayeg siya's abogado kay nindot sab og tingog. Pero ang labing dako nga dayeg ni Frank ang pagtinuod sa abogado sa iyang sulti nga makigdiyaming siya'g diyanitor abi niya'g komplemento lang. (Kataposan)