Konprontasyon - Gula 140

"Ayaw na pagduha-duha ang inyong kaluwasan maoy huna-hunaa niining higayona Pia," matud pa ni Kyle nanghupaw si Pia naghuna-huna og lawom. Apan sa ngadto-ngadto mi-uyon kini sa gusto nila ni Kyle ug Mylene. Tuod man sa walay langan mipauli si Pia sa ila gipasabot ang pamilya kalabot sa ilang pagbalhin og puyo. Gipinahan usab niya ang mga igsuon nga way bisan usa sa mga silingan ang pahibaw-on kun asa sila paingon aron paglikay nga matultolan sila ni senyora Conchita. Tuod man nangandam na ang pamilya ni Pia ang go signal na lang ni Mylene ang gipaabot.

Mipauli si Mylene sa ilang panimalay diin naabtan niya ang iyang ugangan diha sa sala ang iyang bana nga si Ferdie lakip na ang iyang anak nga babaye nga si Diane.

"Nia na ang nagpakasantos lola utrong kuragan bakakong dako," matud pa ni Diane way bisan unsang pulong ang migawas sa baba sa senyora. Mitutok kini ni Mylene nga tabis kaayo ang mata hinay kining miduol ug mibakyaw sa iyang kamot.

Pakkkk!!! Paaakkkk!!! Mipiti ang duha ka aping ni Mylene nga naigo sa sagpa sa senyora wa lang mukihol si Mylene mibawos sa pagtutok sa senyora. Way pulong nga gilitok mihilom ang tibuok balay si Ferdie wala lang mukihol. Igo lang nga mitan-aw gikang nagduko nga naglingkod diha sa sala miyanghag human mabati ang duha ka piti sa aping ni Mylene ug mibalik sa pagduko si Diane usab wala makatingog. Apan ang mata tabis kaayo'g tinan-awan sa inahan wala usab siya maka-uyon sa pagtago nila ni Frdie ug Mylene sa kamatuoran. Ang Senyora mitutok kang Mylene nga ang mga mata ingon og may hait nga hinagiban nga mutusak-tusak sa tibuok kalawasan ni Mylene. Milihok ang senyora hinay ang pagtikang gituyok-tuyokan si Mylene nga nagpabiling nagbarog. Sa huna-huna ni Mylene andam na siya sa unsay mahitabo andam na siya sa mga masakit nga pulong nga isulti sa ugangan. Sa wala pa mahiabot si Mylene nagkasultihanay na sila si Ferdie ug senyora Conchita sa study room. Mihatag sa iyang punto si Ferdie ngadto sa iyang inahan unya human matagbaw ang senyora sa iyang gibuhat nga ingon og panitan si Mylene pinaagi sa iyang panan-aw. Mihunong kini diha sa kilid sa babaye,  pagka maayo mong mitago sa imong sekreto nako kapin sa 20 ka tuig gilimdan mi ninyo? Nagpaka-aron-ingnon ka nga limpiyo? Bilib pa kaayo ko nimo kay lagi usa ka ka-maestra. Mibilib ko nimo kay sa kaugalingon mong pagpaningkamot nakatapos ka sa imong pagtuon sa imong kabuotan nga gipakita namo wala diay mi masayod nga may dunot kang kagahapon ug kini nagpabiling dunot hangtod karon. Dako ang akong respito nimo kay usa ka ka magtutudlo apan mahimo ka kahang maayong panag-ingnan sa imong mga estudyante tungod sa imong pagbaligya sa imong dungog sa club? Pagkamaayo ninyong motago og sekreto diri nako gipatoo ko ninyo sa inyong mga bakak," matud pa sa senyora nga kalmado ang tono.

"Oo angkunon nako nga sa hugaw’ng paagi ko gikuha ang tanan nakong kinahanglanon aron ko makatapos sa akong pagtuon. Bisan niadtong adlaw nga nahimong kami ug sa imong anak bisan giunsa ko niya'g hangyo nga moundang sa akong trabaho kay siya na lang ang moabaga sa tanang galastohan ko sa akong pagtuon pero akong gibalibaran kay bisan sa lapok ko nagpuyo pero may nahibilin pa kong kaikog. May nahibilin pa kong gamay'ng garbo sa akong dughan," matud pa ni Mylene nga kalmado usab nga namulong.

"Namaligya ka sa imong unod sa nagkadaiyang lalaki sa club sama kang Pia nga gikabuangan sa imong anak managsama gyud mo. Wa moy kalainan ug ikaw Ferdie, naliwat nimo si Kyle," matud pa sa senyora. "Sa club man ko nabuhi apan hugtanon kong moalkontra sa giingon ninyo nga namaligya ko sa akong dungog ngadto sa nagkadaiyang mga lalaki. Saksi ang imong anak kun giunsa nako pag-amping ang akong pagkababaye. Bisan kanus-a way laing nakapatong nako gawas sa imong anak," matud pa ni Mylene, nga way pagtibi nga milakra sa panagway apan may luha nga inanay nga miagas sa iyang aping gikan sa iyang mga mata. Ug kinsay patuohon mo? Tanang burikat bakakon!" pagsalga pa ni Diane paghilom Diane!!" Si senyora Conchita nga miisa ang tingog nga mitan-aw sa dalaga nga nahasiga ang mata. (Sumpayan)