Panapaw

Miuliot sa pandungog ni Rey ang wali sa pari sa  gitambungan niyang misa sa simbahan sa cathedral  ning hapona.

"Bisan kun mobati lang ka'g kaibog sa usa ka babayeng minyo na ug ikaw minyo na sab ug nuntan nimo sa daotang  hunahuna nga imo siya nga giangkon sa hingpit bisan sa imong imahinasyon lang, nakasala gihapon ka'g panapaw...!"

Naigo si Rey sa wali sa pari. Sa iyang pagka-CPA, dili ikalimod nga bisan minyo na siya uban sa iyang asawang si Mimi nga usa ka nurse ug may tulo na ka mga anak nga pulos na mga teenager, mobati gihapon siya'g kaibog sa mga babayeng dalagang guwapa ug sa mga babayeng minyo na nga porma og bigot pa kaayo’g mga lawas. Sama sa silingan ni Rey sa Minglanilla nga si Eve, usa ka guwapang maestra sa kolehiyo sa usa ka unibersidad nga minyo na ngadto sa usa ka lisensiyadong arkitekto ug may usa ka anak, hilabihan gyud niyang iboga niini. Kanunay'ng gipantasya ni Rey si Eve. Mao nga daghang higayon nga gikilatis niya'g maayo si Eve sa iyang imahinasyon sa daghang higayon sa iyang  pagkaligo sa banyo ug panahon sa iyang pagkatulog sa kagabhion.

Sa tinud-anay lang, daghang higayon na, nga iyang natilawan ang katam-is ni Eve diha sa iyang imahinasyon lang. Ug daghang higayon nga mata'g romansa niya kang Mimi nga iyang asawa, si Eve ang anaa sa iyang hunahuna nga maoy gikauban niya sa kinatkatay paingon sa taluktokan sa himaya.

Human sa haponong misa, natugkad karon niya nga nakasala diay siya sa laing matang sa panapaw nga iyang nahimo sa iyang kaugalingon. Nalubos ang iyang hukom uban ang hilom nga panaad nga papason na sa iyang kaugalingon ang maong matang sa pagpakasala.

Didto ihatod sa iyang mga lakang si Rey sa prayer room sa kilid sa simbahan. Misulod siya. Miluhod. Mag-ampo siya. Kinasingkasing niyang pangayuon karon sa Ginoo nga hingpit na nga papason ang daotan niyang hunahuna, aron dili na gayud siya makasala pa sa pag-usab sa nahilahing matang sa panapaw. (Kataposan)