Kutihan nga pagkabata

Tay, nganong magbalikbalik man og sulti ang pari nga 'Ang Ginoo maanaa kaninyo',  unya motubag sab ang mga tawo 'anaa usab kanimo'?” ni Butsoy, diyes anyos, bugtong anak ni Teban, usa ka  manananggot.

Nagsakay sila og balsa nga giguyod og kabaw tungas sa bukiran sa Pasunday. Si Teban ang naggunit sa rinda sa kabaw. Tupad niya'g lingkod si Butsoy dapit sa too. Naglagiting na ang kainit sa adlaw ning dapit na ang udtong totok. Gipaningot na sila bisa'g nagkawo. Nanimba sila sa Poblasyon tungod kay birthday ni Butsoy ug atol nga Domingo.

"Ikaw ra may nag-ingon nga balikbalik. Kausa ra man tingale na gisulti sa pari" ni Teban nga gikutihan sa anak.

"Wa ra man nako ipha Tay. Apan akong nahinumdoman, labing minus, kaupat gyud gisulti sa pari" ni Butsoy. "Unsa may naa ana kun balikbalikon sa pari?" "Usa ra man ang Ginoo. Hapit usa ka gatos ka tawo ang nanimba. Kun usa ra ang Diyos, usa ra ka tawo iyang masudlan" "Ang Diyos espiritu, anak, mabahinbahin niya iyang espiritu bisan pila pa ka milyon ka tawo" "Mao ba, Tay? Unya nganong balikbalikon magsulti sa pari? Di ba niingon man ka 'one word is enough for a wise man'?

Wala na magtingog si Teban. "Tubaga ko Tay. Si Tatay sab oy!" Tingali giseguro gyud sa pari nga dili mobiya nila ang Ginoo". "Sa ato pa, Tay, sa unang pagsulti sa pari, naa ang Ginoo sa nanimba ug sa pari. Unya dangtag pila ka minutos, mobiya ang Ginoo. Dayon, mosulti na sab ang pari aron mobalik nila ang Ginoo". "Tingali, anak". "Dili kaha ang tuyo sa pari aron matinood? Kay ang bakak kono, kun balikbalikon og sulti, mahimong tinood?" "Hay, kanimo anak. Si mama Digna na lang unya nimo ang pangutan-a. Kakutihan ba nimo?" "Tatay sab oy! Imo man kong gipaeskuyla aron makat-on. Aron ko kasabut, mangutana gyud ko."

"Si mama na lang unya nimo pangutan-a. Ok?" ni Teban nga medyo napikal ang tunada. Nihilom na lang si Butsoy nga wa gyud nakontento sa iyang amahan. (Kataposan)