Kamaong mosulod, kamaong mogawas

“Unsa may mensahe nimo sa mga batan-on sa di pa nako tapuson akong programa karong adlawa?” ni Kuya Charlie, komentitor sa DYKK ngadto ni Roger Gaquit nga pinasidunggan dinapit ning sayong kahaponon. Daghang tigpaminaw ining maong programa sa ka-Bisay-an ug Mindanao.

Giulohan og Kamaong Mosulod, Kamaong Mogawas. Naghatag og pagtulon-an sa tawo sa tanang matang sa problema. Ang topic karon mao ang pagka-adik ni Roger sa drugas. Nihangad si Roger nga naglingkod atubangan ni Kuya Charlie sulod ning bugnaw’ng estudyo sa radio.

Trentay singko na ang edad niya. Duna nay tulo ka anak. Way klarong trabaho.

Kinse anyos pa si Roger nga nisugod sa bisyo. Bisan og wa siya kaagi og rehab, nakabiya siya sa pagka-adik. Kay iyang mga anak mga tin-edyer na. Si Dante, 16; si Paul, 14; ug si Faith, 12. Di siya gustong mokopya ang mga anak sa bisyo sa ginikanan. Gihimo niyang inspirasyon iyang mga anak kay mga hait og salabutan. Gisuklan niya iyang kaadik. Usa ka tuig na siyang limpiyo sa drugas. Di na gyud mobalik.

“Una sa tanan, kining drugas, kita ray gitonto sa mga druglord nga protektado’g mga politiko. Garbo ra gyud nato ang magtukmod nga motilaw, kay kono di ta maunsa. Kamong nakatilaw na, biya dayon samtang wa pa naadik. Kamong wa pa katilaw, ayaw na pagtilaw. Panid-i lang ang mga nakatilaw. Kabuang, kamatayon o karsel ang resulta. Sayon ra ang pagtumba ining negosyo sa drugas. Law of supply and demand, lang. Wad-a ninyo ang demand.

Mahanaw sab ang supply. Kamong mga ginikanan, isilsil ni sa alimpatakan sa inyong mga anak. Kamong mga way ginikanang nagmatuto, higugmaa ug kaloy-a inyong kaugalingon. Dili na mo angay mosinati pa sa kadaut. Nakita na ninyo sa ubang tawo ang kadaut. Wad-a ninyo ang demand. Aron wa nay supply”, ni Roger. Seryoso. Natandog, nakagakos si Kuya Charlie niya.