Liwat sa amahan

Bugnaw ang hangin ning sayo sa kabuntagon, apan gihamok na sa tumang kahasol ang hunahuna ni Maximo, nagpanagana siya kun iya bang dawaton ang gitanyag sa iyang amahan ngadto kaniya.

Siya ang gipili niini nga maoy padaganon pagka-mayor sa ilang lungsod karong umaabot 2016 nasyonal ug local eleksiyon puli sa iyang amahan.

Wala mosanong si Maximo sa iyang amahan, igo lang niya gikibo ang iyang abaga. Sa tinuod wala siya'y plano nga mosulod sa politika. Nakita niya mismo ang binuhatan sa mayor, kuwarta, goons ug mga armas ang iyang gamiton aron lang pagsiguro sa iyang kadaugan.

Ligdong nga pagkatawo si Maximo, dili niya gusto nga mabulingan ang iyang pagka-abogado. Mahadlokon siya sa Ginoo ug kanunay mosimba matag Domingo busa dili ikalimod nga daghan ang nakadayeg sa iyang kabuotan.

Usa ka adlaw niana kalit giataki ang mayor sa iyang sakit, hinungdan sa iyang hinanaling kamatayon. Gilubong ang mayor unya paglabay sa pipila ka adlaw nakahukom si Maximo nga dawaton ang gitanyag sa iyang amahan.  Magpapili siya sa pagka-mayor, pero sa patas nga paagi. Misang-at dayon si Maximo sa iyang certificate of candidacy didto sa Comelec, daghan ang iyang mga plano sa iyang lungsod. Gusto niya nga mas palambuon pa ang mga proyekto nga nasugdan sa iyang amahan.

Nagsugod na ang kampanya. Gikulbaan si Maximo human niya nakita ang bagang duot sa mga tawo didto dapig kang Romulo. Si Romulo ang higpit niyang karibal sa pagka-mayor.

Usa ka adlaw niana gitawag ni Maximo ang iyang mga sinaligan.

"Kerker, Mark ug Jamby dali! Sunod kamo kanako," ni Maximo nga niabli dayon sa pultahan sa iyang lawak.

"Ah! sir Max, kadaghan nianang mga armas ug kuwarta?" ni  Kerker nga mibudlat ang mga mata.

"Hala! pulos binandol nga tagsa kalibo," tuaw usab ni Jamby ug Mark, nga nagpanilap sa ilang nakita.

"Mao kana ang atong gamiton karong umaabot nga election," matud ni Maximo. "Paninguhaa ninyo nga ako ang modaug kay mabulahan kamo kanako," sumpay ni Maximo nga naghinam-hinam sa iyang kadaugan. (Kataposan)