Nanimawos ang inahan ni Mesya

Dinhi sa ilang eskuylahan si Ines lang kanunay nilang bugal-bugalan. Igo lang intawon mohilak si Ines. Mao gyod kini ang sitwasyon ni Ines dinhi sa Mag-uwak Elementary School.

Pero, ang labing sakit nga bation ni Ines kanang singgitsinggitan siya ug nganlan siya'g anak sa ungo. Sama niaron, lanog kaayo ang tingog nilang Bosyot ug Andro nga nagkanayon, "Ines, Ines Ungo! Ines Wakwak! Ines Sigbin! Ha-ha-haha, Ines kaon og atay sa tawo! Yeeee!" Ug human niining maong mga nagyamayama kuhaon ug tagoan nila ang bag ni Ines. Igo lang mohilak si Ines. Si Inok nga klasmet pod ni Ines may hilom nga kaibog sa dalagita ug molaban kini apan tabangan man kini'g kulata nilang Bosyot ug Andro. Maong mohilom na lang si Inok.

"Ila kong bugalbugalan, Nay Sima. Ingon sila nako, ungo kuno ko. Ang imo kunong inahan nga akong lola, mangtas kuno, hu, hu, hu,  hu," mihilak si Ines. Unya, usa ka hapon may usa ka babaye nga nangita kang Ines, iya kining gitawag ug si Sima maoy miduol sa babaye.

"Unsay tuyo, day?" ni Sima ngadto sa babaye nga taas og buhok.

"Si Sima baya nalimot na nako," niini pa nga nagtingsi. "A-ako ni, uy, si Lucia ... kadali ba nimong malimot. Nia ko kay kuhaon na nako si Mesya. Dalaga na tingali siya, no, Sima. Sabot baya nato..." pahayag sa babaye.

Miyango si Sima ug gitawag si Ines nga dili diay niya tinuod nga pangalan kondili Mesya. Gipaila ni Sima nga kini si Lucia mao ang iyang inahan. Ug mitutok si Ines sa babaye nga ingon sa gaan kaayo ang iyang buot.

"Bugalbugalan ug yamayamaan ka man kuno kanunay sa inyong eskuylahan sa imong mga klasmets, tinuod na?" misiga ang mga mata sa tinuod nga inahan ni Ines.

"O, Ma," mubong tubag ni Ines o Mesya.

Pagka ugma, nadungog nga dunay duha ka buok bata nga wala nay kinabuhi nga naglutaw sa may lugot nga may tubig. Wala na sila'y mga atay ug kasingkasing. Ug nailhan nga sila si Bosyot ug Andro. (Kataposan)