Kahulogan sa kinabuhi
Nakita na sab ni Romy si Nardo nga naglansad sa iyang iro. Si Romy maglibotlibot sa plasa balig usa ka oras gikan sa alas sayes ngadto sa alas siyete. Retirado siya nga magtutudlo hilig og pasingot.
Silingan ug katalirungan silang duha si Nardo, ulitawong guwang ug way anak. Karon nga tiguwang na siya nagpangutana kun unsay kahulogan sa kinabuhi. Negosyante siya ug maayo'g lakaw iyang negosyo nga convenient store, duna na siya'y 60 ka sangang tindahan.
"Unsa man gyud kahay kahulogan sa kinabuhi no?" ni Nardo dihang nagkahinabi na sab sila ni Romy. "Di ba sa batan-on ka pa tungod sa imong kaharuhay na diin-diin ka na'g suroy sa Pilipinas ug sa ubang nasud? Wa gyud nimo hipalgi ang hustong tubag?" ni Romy. Namahid sa iyang singot ginamit ang dalang t-shirt. "wa gyud" ni Nardo. "Di ka masuko kun isugyot nako nimo ang tubag?" ni Romy. "Nganong masuko man? Nga naa ra man nako kun motuo ba ko dili nimo?" ni Nardo.
"Ok ang kahulogan sa kinabuhi mao nga motuo ka nga naay Ginoo. Ang Diyos naghatag nimo'g kinabuhi aron motandog sab ka'g laing kinabuhi sa tawo aron makasabot sab siya sa kahulogan sa kinabuhi," ni Romy. Hmmm nakahikap si Nardo sa iyang suwang nihangad.
"Sama ron ining imong pet dog, pinangga kaayo nimo. Kay may kinabuhi ni imong giatiman, gipakaon, gilimpiyohan, gilansad ug gisuroy nimo kada-adlaw--imong gihataga’g bili o importansiya ang kinabuhi sa imong iro. Di ba nalipay ka nga himsog imong iro?" ni Romy. Niyango si Nardo nalipay man gani ka nga iro ra na unsa pa kaha kun tawo na gyud nga imong gimahal,?" ni Romy.
"Wa man koy asawa, anak o kapuyo," ni Nardo. "Daghan ka mang igsuon ug pag-umangkon, maoy imong himuong pet relatives dungan sa imong pet dog," ni Romy.
Nagyangoyango si Nardo. Sakto ka Rom nadiindiin na ko'g pangutana niini apan ikaw ray nakahatag og tubag nga nauyonan nako. Salamat ha," ni Nardo. (Kataposan)
- Latest
