Namasol si Antoy ungo

Kada adlaw tua gyod si Antoy sa dagat aron mamasol. Si tatay niya Emoy maoy nagtudlo niya sa pagpamasol.

Dili man unta gusto sa iyang nanay Usang nga mosunod siya sa mga lakang sa iyang tatay Andoy kay lagi damgo man sa iyang nanay nga makatungha siya ug unya makakuha'g kurso ug makalampos."Gusto ko, Antoy, nga mahimo kang usa ka  engineer," matud sa iyang nanay Usang. "Duna koy tinigom nga kuwarta, ug gusto ko nga motungha ka, aron duna sab koy anak nga nakatapos sa iyang pagtuon..."

"Gusto ko, Nay, nga mahimong mananagat," hinay ang tingog ni Antoy. "Total, mabuhi man ko sa akong panagat, kun pananglit wala na mong tatay Andoy dinhi sa kalibotan..."

Mao nga ang nawong ni Antoy tua ra gyod sa dagat. Ug ang makuha niya iyang ibaligya. Duna siyay pambot, subiran, ug may baroto siya nga alang lang sa iyang pagtabok sa isla. Si Nena, anak ni Claudia-Basti naibog kang Antoy. Apan, wala gyod makaditik ang ulitawo bahin sa mga lihok ug pagtan-aw sa dalaga kaniya. Usa ka adlaw, miduol si tatay niya Andoy ug may gisulti.

"Antoy, tiguwang na ko, ug gusto nako nga ibilin nako nimo ang akong tinagoan," ni tatay pa niya Andoy.

"Unsa man, Tay?" mitutok si Antoy sa amahan.

"Ang akong pagka ungo."

"Ungo, Tay?"

"Oo, Antoy, kaliwat ta'g ungo. Ug kay ulitawo ka na man, ihatag ko kining garapa nimo. Dad-a gyod kini bisa'g asa ka, kay kun moinom ka ini, makalupad ka," ug gidunol ni Andoy ang garapa.

Tuod, matag takdol sa buwan ini'g tokar sa pagka ungo ni Antoy molupad siya kun mosimhot siya sa garapa. Usa ka adlaw niana nakugang si Antoy kay dihay mikalit og tugpa sa iyang sakayan. Si Nena!

Ungo sab diay si Nena kay sila si Claudia ug Basti kaliwat pod pagka ungo. Karon samtang namasol si Antoy diha si Nena sakay sa iyang sakayan ug nagsabot sila nga inig takdol sa buwan manglupad sila aron mamalbal og tawo. (Katapusan)