Tungaw

Sa pagdangadanga ko sa sapa sa Kandangas, nabati ko ang kusog nga palupalo sa mga panapton nga gilabhan. Wa gyud ko masayop! Ning buntaga nanglaba sa daplin sa sapa si Ledy. Nag-inusara lang. Tayming kaayo nga siya lang ang nanglaba. Ug makahigayon na gyud ko sa pagpanguyab niya.

Hagbay pa kong  hilom nga nahigugma kang Ledy. Lalim bay gikan pa sa among panagklasmeyt sa elementarya ug hangtod karon nga  nakagradwar na mi sa hayskol, pwerteng luom-luom ko sa akong gugma kang Ledy.

Di ko gusto nga maunhan ko’s akong mga silingang ulitawo nga nakagusto sab ni Ledy, sama nilang Pekoy, Henry, Redo ug Isyot.

“Naa ra ka’s inyo ugma’s buntag, Led....?” pangutana ko kang Ledy nga mikihat kaniya kagahapon nga nagkadungan mi og sag-ob og tubig sa atabay.

“Manglaba ko sa sapa ugma’s buntag, Tungaw...!” ni Ledy nga nagpahiyom usab kanako. Tungaw ang akong angga sa akong Papa ug Mama ug sa tanan kong katalirungan sa baryo, kay gamitoy kong pagkabata sa elementarya pa ko. Maayo gani kay sa pagkahayskol na nako, mitubo ug midako gyud ko. Apan Fred gyud ang matuod kong angga kay Alfredo man ang akong ngalan.

Nakahukom ko nga padayong magpasalipod sa dakong guk-ong nga bato sa di pa ko moduol kang Ledy nga nanglaba sa sapa. Pastilan, atbang kaayo siya nako nga padayong nagkusokuso sa iyang linabhan sa sulod sa iyang planggana. Maayong pagkawalis sa palda sa nahupit na niyang sayal. Sus! Klaroha sa puti ug bugol nga paa ni Ledy, uy, nga nagbila.

Apan nahaungot ang akong panan-aw sa puti ug bugol nga paa ni Ledy, lahos na sa nag-ugbon niyang bilahan. Klaro kong naaninaw nga may mapangahason nga mikamang ug misimhot na gayud sa ugbon niyang tinagoan. Usa ka tungaw!

Abtik kong migula sa akong gihup-an ug mipadulong sa nahimutangan ni Ledy. Panguyaban ko na gayud siya, uy! Di ko paalkanse sa mapangahasong tungaw. Ug nagpahiyom si Ledy sa pagkakita nako niadtong buntaga. Tam-is ang iyang pahiyom! Ug namatikdan ko nga may hilom siyang gitusod sa ugbon niyang bugan – ang mapangahasong tungaw! (Kataposan)