Husay nga tinamban

Alas kwatro sa kaadlawon didto na si Celso atubangan  sa Kapitolyo. Unya may nakita siyang nanaog sa taxi duol sa flag pole, taas ug dakuon nga tawo.Miduol kini kang Celso.

"Maayong buntag, Sir," nangatahuran si Celso sa dihang nahiduol na kini kaniya.

"Maayong buntag, sab" tubag sa tawo, "sayo ka man?"

"Nagpaabot ko's akong mga kauban, Sir, duna mi trabahuon nga taytayan sa Ginatilan. Nalusno ang taytayan nga kahoy. Ikaw, Sir, sayo man sab ka?" sukling pangutana ni Celso.

"Mag-alay-lakad mi karong alas sais," matud sa tawo ug mipuno siya "nia diay ka sa Kapitolyo magtrabaho?" "Oo, Sir, nag-antos sa suweldong gamay," tug-an ni Celso.

"Pila man diay ang imong suweldo dinhi?"

"P230 ra ang inadlaw Sir, kulang kaayo."

"Mao ba?" hinay apan nataas ang tunada sa iyang sulti. "Wa ka bay sideline nga ikapuno-puno sa imong suweldo?"

"Wala Sir, kini ra gyud maoy akong gisaligan," matud ni Celso.

"Naa ko sa COA magtrabaho," tug-an sa tawo, "unsa man, moinom ka ba og ilimnon nga makahubog, motabako o manugal?" "Wa ko nianang mga bisyoha Sir," mubong tubag ni Celso.

"Gamay ra gyud hinuon kanang imong suweldo," nagkanayon ang tawo.

"Lisod badyeton Sir."

"Kinahanglan nga mo-save ka sa imong kinitaan. Pananglitan parehas ta'g suweldo P230.00. Unya ikaw, nigasto ka og P231.00, ako kay nigasto lang og P229.00, kinsa may nakatigom natong duha?" Salabtunon nga pangutana sa tawo.

"Sakto ka Sir, nakatigom ka og P30.00 sa usa ka bulan samtang ako..." wala matiwas ni Celso ang buot pa unta niyang isulti kay gibaraw siya sa tawo.

"Mao nay buhata. Kay bisan unsa ka gamay sa atong suweldo nag-agad ra sa atong diskarte. Sige magbulag ta kay nia na ang akong mga kauban," matud sa tawo dungan ang pagpikpik sa abaga ni Celso.

Igo na lang ginuntan pagtan-aw ni Celso ang tawo nga mitalikod kaniya. Talagsaon nga pagtulon-an ang iyang nakat-onan sa maong tawo. Unya nangabot ang mga kauban ni Celso sa trabaho ug nanakay sila sa dumptruck nga gimaneho ni Edwin Margaja paingon sa Ginatilan. (Kataposan)