Ang balaang bata

Wala mopatuo sa mga tambag si Junel sa iyang asawa nga si Alma nga dili na mogamit sa panagatan nga dinamita.

Usa ka adlaw niana nanagat si Junel sa halayong dapit diin walay makakita sa paggamit sa dinamita. Wala maglangay may nasiplatan siyang bagang duot sa mga dagkong isda. Dali niyang gikuha ang dinamita. Apan sa kalit lang ingon sa adunay tawo nga kusgan nga buot moilog sa dinamita. Naigpot si Junel, kay aduna nay usa ka bata nga naa na sa iyang luyo.

"K-Kinsa ka? Nganong kalit kang nibutho...?"

"Ako ang manluluwas, Manoy, sa mga dinaugdaog. Ug hununga na ang paggamit sa dinamita, kay mangamatay ang mga gagmay'ng isda. Ug adto unya sa siyudad sa Sugbo aron mosimba," matud sa bata nga dalang pahiyom.

Ingon sa giugbok si Junel sa iyang gibarogan, kay ang bata nilakaw kini sa dagat nga gihimo lang kamad-an. Nakapanglingo-lingo si Junel sa iyang nasaksihan dayong kahanaw sa bata. Paglabay sa pipila ka gutlo ningsiga ang iyang mga mata, kay ang gisakyan nga pambot daghan na og mga  isda.

Nagduda si Junel sa bata nga maoy naghimo niini. Tungod sa maong hitabo nakasaad siya nga dili na mogamit sa dinamita.

Wala maglangan gituman niya ang sulti sa talagsaong bata. Niadto siya sa siyudad sa Sugbo  uban sa asawa ug mga silingan nga mga tindera sa canteen sa Opascor nga sila si Janice, Marites, Lalat, Lanie, Flor ug Epen.

Ug sa didto na sulod sa simbahan may kalit lang nitupad ni Junel nga usa ka bata. Nakabantay siya nga ang nitupad susama'g dagway sa bata nga nakita sa dagat. Unya daling nilakaw ang bata sa unahan. Nananghid si Junel sa iyang mga kauban, kay aron sundon ang bata ug nahanaw sa iyang panan-aw.

Sa tantong paglingi-lingi ni Junel nanglurat ang iyang mga mata, kay ang iyang gipangita naa sa kilid sa iyang gibarogan, mao ang rebulto ni Senor. Sto. Niño nga kaanggid sa nitapad kaniya. Daling niluhod si Junel sa maong rebulto. (Kataposan)