No regrets

Gula 49

"Oo, Carlo, nakaila ka kaayo sa maong lalaki,"tubag ni Mira.

"Kun mao kinsa ang maong lalaki nga maoy nagustohan ni Marissa, Mir?", interesadong pangutana sa lalaki.

"Ayaw na basin ikasuko mo pa," ni Mira pa nga gidunganan sa pagpanghupaw gibira og hinay ang bukton sa babaye.

"Sultihi ko'g kinsa," medyo gahi na ang tuno sa sinultihan sa lalaki.

"Ayaw na lang lagi basta adunay laing nagustohan si Marissa, busa ayaw na lang pagsige'g dot-dot sa imong kaugalingon kaniya. Makadaghan nang higayon nga gibusted ka niya wa ba? Kana tungod kay wala ka niya higustohi ug lain ang iyang gihigugma Carlo. Tambag ko lang move on kalimti na si Marissa, ibaling ngadto sa laing babaye ang imong gugma. Ikaw nasayod gyud kun unsa kadako sa akong gugma kanimo. Sa pagtugyan ko lang sa akong pagkababaye nimo kamatuoran na kana nga ako adunay gusto nimo. Apan nasayod ko nga bisan gamay wa kay pagbati nako. Karon ingnon tika nga gidawat ko na kana igo na alang nako nga nasayod ka kun unsa kadako sa akong gugma nimo Carlo. Maisip man nga ingo'g akoy nag-una-una mura'g gipanghagad ko ang akong kaugalingon sa lalaking bisan gamay wala mahigugma nako apan dili ko kana igsapayan. Igo na ang tanan alang nako nga may nahitabo nato.

Wala ko mahayi ang pagtugyan ko sa akong pagkababaye nimo kana tungod sa dako kong gugma kanimo Carlo," pagpasabot pa ni Mira nga inanay usab nga mitulo ang luha dayong nanghupaw  mihangad sa langit ug gianinaw ang kamalinawon sa dagat samtang nagpamahid sa iyang mga luha.

"Mira," bugtong pulong ni Carlo.

"Wala ko mohilak aron imong kaloy-an surrender nako Carlo, wala sab ko misulti nimo niini aron padayon ipamugos ang akong kaugalingon nimo. Pakasamahon ko kining gabhiona nga labing maanindot nga yugto sa akong kinabuhi diin gikauban ko ang lalaki nga gihigugma ko sa hilabihan. Lalaki nga maoy natingban ko sa tanan salamat sa kahigayonan nga gikauban tika bisan sa pipila lamang ka mga oras. Nakig-uban ka man tuod nako karon apan nahibawo ko nga ang akong pagkababaye lang ang imong gi-apas. No regrets Carlo, nalipay sab ko sa tibuok nakong kasing-kasing. Salamat niining gabii nga puno sa kalipay ang gibati ko, salamat Carlo," matud pa ni Mira nga mibakho na usab gikuptan ni Carlo ang kamot ni Mira.

""Mir, sorry pero bisan unsaon nako wala gyud.. nahibawo ko kun unsa kong klaseha sa pagkatawo karon nga nabati ko ang imong sentimento. Mas-nakaingon ko karon nga dili ko angay nimo buotan ra kaayo ka nga mahipunta sa sama nako.

Sorry nga dili ko mahimong tugbangan ang imong gibati nako salamat sab sa higayon sa pagtugyan mo sa imong pagkababaye sa dakong kasayon labaw sa tanan sa imong gugma nga dili ko mahimong tugbangan," seryosong pulong ni Carlo. Mipiyong na lang si Mira gipahiran ang mga luha nga halos mibasa sa tibuok niining aping miginhawa kini og lawom.

"Dali na Carlo, mamalik na ta sa cottage," pag-agda pa ni Mira mitutok si Carlo kang Mira. May kaluoy nga namugna diha sa dughan sa lalaki ngadto sa babaye nakaingon sa kaugalingon nga buotan gayud si Mira, apan dili sab niya mahimong bugtian ang gibati sa babaye.

"Sorry ha," matud pa ni Carlo mipahiyom na lang si Mira.

"Okay lang Carlo. Dali na," matud pa sa babaye mipaingon ang duruha sa cottage nga nahimutangan sa ilang mga gamit. Sa ilang pag-abot diha na sila Vincent ug Bea nga gikan usab sa dapit nga ilang nahimutangan ang dakong bato sa unahan. Gitan-aw ni Vincent si Carlo ug mingisi may buot ipasabot misikit ang lalaki kang Carlo.

"Tsk tsk tsk.. Biliba nako nimo," matud pa ni Vincent.

"Ha? Unsay bilib? Unsay buot mong ipasabot?," pangutana ni Carlo sa higala. (Sumpayan)