Eyukaristiya: Sakramento sa gugma

Sa nagsingabot na gayud ang kalihokan alang sa ika-51 nga International Eucharistic Congress (IEC) dinhi sa siyudad sa Sugbo, wa sipyata ni Romy ang pagtambong sa usa ka seminar nga naghisgot sa pagpaambit kun unsa gayud ang kahulugan sa Eyukaristiya diha sa kinabuhi sa tawo. Mipukos ang atensyon ni Romy ug naminaw gayud siya sa usa ka madre nga mamumulong. Ang madre nagpaambit ngadto sa tanang nanambong sa seminar, mahitungod sa kamahinungdanon diay sa Eyukaristiya sa atong kinabuhi, isip sumusunod ni Kristo. Matud pa sa madre:

“Nahibawo na kita nga ang Eyukaristiya mao ang Santos nga Misa, kumunyon o pangalawat atol sa misa ug ang pagsulod sa prayer room sa simbahan aron sa pag-ampo sa Ginoo! Buot kong pahimug-atan nga ang Eyukaristiya, usa ka sakramento sa gugma, usa ka timaan sa pagkausa ug talikala sa kaluoy...!”

Daw naanod si Romy sa gipaambit sa madre, ilabi na sa katapusang linya sa iyang mensahe nga talikala sa kaluoy. Haom sa tema nga buot ipatisok ni Santo Papa Francis kanatong tanan nga “mercy and compassion”. Ug isip usa na ka formator sa formation class sa relihiyusong kapunongan nga iyang gimembrohan dinhi sa siyudad sa Sugbo, buot niyang tugkaron pag-ayo ang mamumulong nga madre sa pag-ingon nga ang Eyukaristiya, usa ka sakramento sa gugma, timaan sa  pagkausa!”

“Hmm! Nakuha ko na ang punto sa madre nga buot niyang ipalungtad nga nahisulat sa Bibliya...!” tuaw ni Romy sa hilom nga nagpasiklap sa madre nga napahunong sa iyang pagsulti. “Husto gayud ang madre! Kay ang Ginoo nag-ingon man: Amahan, Mausa Unta Sila Dinhi Kanato, Ingon  Nga Ikaw Ania Kanako Ug Ako Anaa Kanimo, Aron Sila Mausa, Ingon Nga Ako Nahausa Diha Kanimo...!” nakapahiyom si Romy. Naunhan niya ang madre sa buot ipalungtad niini. Ug tuod man, dihang mipadayon ang madre sa iyang pagpamulong, sakto gayud ang diha sa hunahuna ni Romy. Unya, dugang pa gayud nga nakatuaw si Romy.

“Ang magtutuo mahimong usa ka lawas, usa ka espiritu diha ni Kristo pinaagi sa Eyukaristiya...!” (Kataposan)