Wala koy labot sa kagahapon

Usa ka sayong buntag samtang naglakaw si Philip sa usa ka dalan sa subdivision diin siya mag-abang og kuwarto, may nasugatan siyang usa ka babaye nga kun wala siya masayop gikan  usab nag-jogging. Iyang nakita nga mipahiyom ang babaye kaniya. Ug iya kining gitimbaya.

"Nag-jogging ka, Miss?" ni Philip pa ngadto sa babaye. Mipahiyom ang babaye. "Oo, sayo kong nag-jogging..." "Parehas diay ta," mubong pahayag ni Philip."Ako nia ra sa subdivision magpuyo, ikaw, nia ka ba sab dinhi magpuyo?" pakisayod ni Philip. "Oo, naa sa ka Doktor Fuentes," sa babaye nga mipahiyom gihapon. "Mao ba. Ako diay si Philip. "Rosalinda...Rosy ang akong angga," sa babaye nga mipaila usab sa iyang pangalan.  Ug mao kadtong adlawa nga maoy matawag nga una nilang panagkita. Ug daghan pang mga kadlawon nga magkakuyog sila sa pag-jogging.

Usa ka sayong buntag wala tuyoang nahatod ni Philip sa gipuy-an niini. Ug nahaiknat ang iyang kilay dihang: "Mommy, Mommy!" Ug mihangop kini kang Rosalinda. "May anak na diay," kalma nga sulti ni Philip. "Oo. Lima pa kini siya ka tuig."

"Liwat bitaw nimo ang iyang nawong." Ug nanulod sila si Rosalinda ug ang gamay'ng bata sa balay ni Doktor Fuentes. Ug paglabay sa daghang adlaw wala damha ni Philip nga nagkasuod ang ilang pagbati ni Rosalinda. "Philip, may kagahapon ko. May nakaangkon na kanako, apan iya kong gibiyaan," ni Rosalinda sa hinay nga tingog. "Si Lilet, mao ang bunga sa among pagminahalay ni Sancho. Apan iya kong gibiyaan..."

"Rosy, mahal ko ikaw. Di ko igsapayan ang nahitabo nimo. Ang importante alang nako mao nga mahal ko ikaw ug mahal mo ako, ug si Lilet ako pong mahalon..." ni Philip. "Ako ang mopangga kaniya isip amahan ni Lilet bisa'g dili tinuod nga amahan.

"Salamat, Philip. Si Sancho, wala na. May lain na siyang babaye nga iyang gipuli nako. Ug kausa nagkita mi, ako siyang giprangkahan nga dili na mahimong manghilabot pa siya namo ni Lilet. Buwag na mi, Philip..." ni Rosy nga seryos ang nawong.  (Kataposan)