Luha sa kalooy

Daling migawas si Carlo sa Parlor. Wala mananghid ni Eser. Dihang naabot na si Carlo sa ilang panimalay, wala na niya maabti pa ang amahan. Nakagikan na diay kini paingon sa trabaho. Milahos siya sa kusina, ug nakita niya nga may pagkaon sa lamesa nga giandam. Bisan sa iyang sala nga gibuhat, nakulatahan sa iyang amahan, nagpabilin gihapon ang pag-atiman sa iyang papa kaniya.

Gilingi ang nahimutangan sa center table sa sala diin adto sagad ibilin ang kwarta nga iyang balon, nakita niya nga may kwarta kining gipatongan sa flowervase. Mitan-aw pagbalik sa naka-andam nang pagkaon sa lamesa, may fried rice, hotdog ug tocino.

May baso usab nga giandam, tasa, kape ug asukal. Tungod sa kagutom nga gibati sa ulitawo dali kining milingkod ug gisugdan ang pagkaon sa inandam nang daan nga pagkaon. Samtang nagkaon, nahunahuna niya kun unsa siya ka mahal sa iyang papa.

Bisan sa iyang kabadlungon pero nagpabilin gihapon ang pagpangga sa iyang amahan kaniya. Dihang nakulatahan siya sa iyang papa, mao kadto ang labing grabeng pagkulata nga iyang nahiaguman gikan sa amahan. Apan sa iyang nasaksihan nga pag-atiman sa amahan nianang buntag, wala mapugngi ni Carlo ang gibati. Kalit nga mitulo ang luha. Nakaingon sa kaugalingon nga kun unsa gyud diay siya ka pinangga sa iyang papa.

Nakaingon usab siya sa iyang kaugalingon nga, “nahibawo ko pa nga swerte ko kay naa ka nga mipakita gyud og pagpangga nako. Swerte ko nga naka-amahan nimo. Bisan sa akong pagpabadlong pero padayon gihapon kang mipakita og pagmahal nako.  Bisan og dili tiaw ang imong kasuko tungod sa akong gibuhat pero wala gyud molubad ang imong pagmahal nako. Mas natugkad ko na nga kun unsa diay ko nimo ka mahal.

Pasayloa ko pa kun badlongon kaayo ko. Labaw sa tanan, pasayloa ko nga wala ko magtarong sa akong pagtuon.” Hagawhaw nga pulong ni Carlo nga nag-inusara samtang nag-usap sa pagkaon nga inandam sa amahan. Mahulog man nga salawayon nga bana si Arturo apan mapinanggaon usab kini nga amahan. Nagluib man sa asawa, pero dili siya makahimo sa pagpasagad sa anak. Giatiman bisan pa man og daku na si Carlo. Pagpangga sa amahan nga way pagkalubad bisan unsa kini ka salbahis, bisan unsa kini ka barumbado. Amahan si Arturo sa bugtong anak, amahan nga magpabiling amahan luyo sa pagkabadlungon sa anak. Dili mobati og kapuol sa pag-atiman.

Dili mohunong pagpabati sa iyang gugma sa anak bisan pa sa tanan. Magpabiling amahan hangtud sa kaposang pinitik sa iyang kasing-kasing. Si Arturo, dili man maayong panag-ingnan nga bana, apan mamahimong kapanaminan sa uban nga mga amahan. Mamahimo sang dili kapanaminan sa uban tungod sa iyang pagkahimabaye, apan bisan pa, may maayong hiyas si Arturo. Kini mao ang kaatimado niya sa iyang bugtong anak. Pagpangga ug pagmahal nga dili pwedeng ihikaw niya ngadto sa pinanggang anak nga si Carlo.

Sa trabaho, samtang nagsakay sa armoured van si Arturo, wala mahanaw ang kabalaka nga gibati. Mga pangutana nga padayong gipangutana s a hunahuna, ‘hain ang iyang anak?’ Kay gabii pa lang, gihunahuna niya ang pagdagmal niya sa pinangga niyang anak. Naghigda sa kama nga nagsige’g tubod ang luha, nalooy sa anak. Lab-as sa iyang panumduman ang hulagway sa anak nga naa sa suok nga mipungko, giabot ang suwang ug tuhod samtang gibakos ang bukton ug gitago ang ulo. Lab-as pa sa huna-huna sa amahan kay ang maong panghitabo nga iyang gibuhat sa anak,  nianang gabii pa man.

Makita pa sa hunahuna ni Arturo ang anak nga inanay nga mihangad ug mitan-aw kaniya. Gipiyong ni Arturo ang mga mata samtang naghunahuna sa anak. Naghigda sa iyang kama, pero ang luha way hunong sa pag-agas gikan sa iyang mata. Makita pa man niya ang talan-awon gikan sa anak, nga nagkurog ang ngabil gumikan sa pagbakho.

Pagkurog nga inubanan sa tingog nga mananoy gikan sa anak. Makita sa amahan diha sa iyang huna-huna si Carlo,  nagsige’g hilak diin nag-abot ang sip-on ug ang luha niini. Sa kinahiladman samtang gilantaw ang anak, morag gikumot ang dughan sa amahan,  didto na lang niya gipagawas sa iyang kwarto ang mga LUHA SA KALOOY ngadto sa anak.  Nakatulog na lang si Arturo nga may luha ang mga mata.

“Hoyyy! Naunsa ka? Mihilak man gud ka diha.” Pulong pa sa iyang kauban nga si Victor nga sama niya armoured van security guard. Nakurat si Arturo pagsiko ni Victor kaniya. (Sumpayan)